A UVigo acolle Evento In, unha cita para celebrar a diversidade da comunidade LBTBIQ+

O momento actual de debate dos dereitos e do xeito de estar da comunidade LGTBIAQ+ na sociedade, “que nos cremos que ten que ser, obviamente, en igualdade de condicións xurídicas, pero tamén sociais, e é neste segundo eido onde a comunidade atopa máis obstáculos e os más difíciles de remover”, detalla o doutorando da UVigo Antonio Villanueva, está na xénese da organización do Evento In, que a vindeira semana arrancará na Facultade de Filoloxía e Tradución cunha mesa de traballo sobre teoría feminista e teoría queer e un obradoiro de linguaxe inclusiva. Evento In (Internacional, Inclusiva, Investigadora). A UVigo celebra diversidade é unha iniciativa da Vicerreitoría de Responsabilidade Social, Internacionalización e Cooperación, o Consello de Estudantes e o Consello Social da UVigo que ten o obxectivo de, a través de relatorios, obradoiros e poesía, sensibilizar e celebrar a diversidade da comunidade LGTBIAQ+, “o cal tamén beneficiará todo tipo de diversidade, pois comprender e respectar a diversidade é máis unha actitude e un hábito que outra cousa”, explica o seu director, que agradece á Universidade, e en especial á vicerreitora Maribel Doval, o seu interese e apoio para poñer en marcha esta iniciativa.

Neste sentido, Maribel Doval explica o compromiso da UVigo con este iniciativa "por seren unha actividade proposta polo estudantado, e o seu carácter divulgativo e de transferencia do coñecemento dende a Uvigo cara á sociedade nunha área, como é a diversidade da comunidade LGTBIAQ+, o que fai destas xornadas unha iniciativa pioneira en Galiza". As e os organizadores teñen moi presente que a celebración de Evento In coincide no tempo coa reaparición en España e noutros países de mostras públicas de violencia LGTBIfóbica “no seo dunha sociedade fragmentada, polarizada e, polo tanto, radicalizada, que carece puntos de apoio e referentes honesto e superficiais”, sinala Antonio Villanueva, que considera que “a reflexión é imprescindible, pero na sociedade actual tamén é unha cuestión de supervivencia, por desgraza”, asegura. Pola súa banda, a vicerreitora considera que "o colectivo atópase IN, dentro da sociedade, pero todavía privada de certos dereitos e, sobre todo, enfrontándose a obstáculos sociais", lamenta Doval.

Másnoticias

Veinte estudiantes de la UVigo reciben beca de la Xunta para estudiar fuera de la UE

24/08/2025

Investigadores do CIM estudan o papel do plancto mariño no almacenamento de CO₂ nos océanos

01/08/2025

Case unha vintena de conferencias e un obradoiro en Vigo

18 relatores e relatoras achegarán entre os días 4 ao 6 de outubro os seus coñecementos e opinións sobre cuestións que van da regulación do trans, á biodiversidade e construción de identidades, pasando pola transexualidade e transxenerismo, a arte e diversidade ou a etnografía e identidade de xénero non binario. O Círculo de Empresarios de Galicia en Vigo acollerá os relatorios, que tamén se poderán seguir de xeito virtual, e que se organizan en tres áreas temáticas: relacións de veciñanza, urbi et orbi e control de masas.

“A primeira xornada”, que se celebrará o luns 4 de outubro a partir das 16.00 horas, “chámase Relacións de veciñanza, porque se falará dos distintos colectivos da comunidade e tamén da relación entre eles, cunha reflexión final que aborda a relación coa sociedade. O segundo día, Urbi et orbi, reflexionarase sobre a situación da comunidade dende unha perspectiva internacional, etnográfica. E o último día, Control de masas, céntrase na representación da comunidade na cultura de masas que, como sabemos, é un medio para controlar a opinión e o comportamento da xente. Esta reflexión axudará a desenvolver unha mirada crítica ante os estereotipos que nos rodean”, detalla Antonio Villanueva. O organizador, que destaca os méritos académicos e o nivel intelectual de todas e todos os poñente, incide na participación nestas tres xornadas da reitora trans da Universidad de EAN de Colombia, Brigitte Baptiste; da primeira catedrática abertamente trans de España, Maria Echebarría Sáenz; de Natividade Gutiérrez Chong, referente no estudo dos muxes mexicanos ou do profesor José Ignacio Pichardo, investigador da comunidade LGTBIAQ+ en España e no estranxeiro. As persoas interesadas en seguir os relatorios deberán inscribirse cubrindo un formulario.

Con anterioridade á celebración das conferencias, o Evento In comezará os días 28 e 29 de setembro con dúas actividades na Facultade de Filoloxía e Tradución, organizadas pola docente e investigadora do centro Beatriz Suárez Briones. O día 28 terá lugar a presentación da mesa de traballo Teoría feminista e teoría queer e o Obradoiro linguaxe inclusiva In-formando a diversidade, que tamén se celebrará ao día seguinte. A mesa de traballo dará a coñecer esta actividade á comunidade universitaria a través da análise de textos que pertencen a estes estudos, mentres que o obradoiro de linguaxe inclusiva diríxese ao alumnado co obxectivo de formalo na utilización deste tipo de linguaxe na redacción de traballos académicos, como TFG. “Cremos que a nosa linguaxe coñecerá un cambio neste senso que afectará á nosa maneira de expresarnos e, en consecuencia, temos que ir coñecendo a maneira de incorporar a diversidade tamén neste ámbito”, explican desde a organización do Evento In.

Recital poético In-Amor-Es en Pontevedra

As actividades chegarán ao seu fin coa celebración o 15 de outubro, a partir das 20.00 horas, no Teatro Principal de Pontevedra, do recital In- Amor-Es no que participarán as poetas Andrea Nunes Brións e María Rosendo Priego, o poeta Jesús Castro Yañez e o músico Lois Búa. “In' significa ‘dentro’, ‘ao interior’ (infiltrar), aínda que tamén ‘privado de’ (inacabable), e cando é unha cuestión de Amor (Amor-Es) a comunidade LGTBIAQ+, coma todos, podemos estar dentro, como privados del. E trátase de que todos esteamos dentro. Ademais, dun xeito coloquial, ‘in’ significa estar de moda, e o amor sempre está de moda: non pode ser doutro xeito”, explica Antonio Villanueva, que reivindica o poder subversivo da poesía, “tanto coma o dun escrito científico”, asegura.