A mostra "Os mundos de Carlos Casares" chega a Vigo

Unha parte da exposición // Fundación Carlos Casares

A exposición central das Letras Galegas 2017, Os mundos de Carlos Casares, chega este mércores, 27 de setembro, á Casa das Artes de Vigo, onde se poderá visitar ata o próximo 5 de novembro.

Comisariada por Gustavo Adolfo Garrido e Chus Martínez Domínguez, a mostra propón un achegamento ao universo vital e literario do autor ourensán, a través dunha sucesión de territorios simbólicos: Paisaxes, Luzadas, A Viaxe, Conviña… e O Redondel, nos que se tratan aspectos fundamentais da traxectoria vital e creativa de Casarares, e da súa interacción co mundo.

Másnoticias

A Deputación reivindica en Vigo a Delgado Gurriarán como exemplo da loita polo país e o galego

25/05/2022

O dúo vigués Dioivo pon música metal a Florencio Delgado Gurriarán

18/05/2022

A exposición conta con máis de 500 pezas, entre as que se poderán contemplan imaxes da infancia, notas manuscritas de Vicente Risco, un cinematógrafo con bobinas orixinais do autor, recortes de prensa ou o seu certificado de voda. A mostra divídese en cinco espazos para presentar os diferentes marcos nos que Carlos Casares se relaciona co mundo, explicando así cuestións fundamentais da súa vida, da súa promoción literaria e do seu compromiso co país e as súas xentes. A cartografía resultante permite visitar a escena cultural galega nas cinco últimas décadas, recuperando unha visión do escritor e dos seus lugares que buscan conectar coas xeracións máis novas.

Promovida pola Fundación Carlos Casares coa colaboración da Consellería de Cultura e Educación, dos concellos de Ourense e de Xinzo de Limia e mais polas deputacións provinciais de Ourense e da Coruña, Os mundos de Carlos Casares é a iniciativa central da conmemoración das Letras Galegas 2017.

Casares, anfitrión das Letras Galegas 2017

Carlos Casares Mouriño (Ourense, 1941-Vigo, 2002) é unha das figuras máis senlleiras e renovadoras da literatura galega das últimas décadas do século XX. Para o narrador, ensaísta, articulista de prensa, editor e dinamizador cultural, o humor e a sinxeleza e a claridade no tratamento dos temas que lle afectan ao mundo actual constitúen os trazos máis característicos do seu estilo narrativo e ensaístico, o que lle reportou un gran recoñecemento do público e da crítica.

Membro numerario da Real Academia Galega (RAG) ata o seu falecemento no ano 2002, director da Editorial Galaxia e presidente do Consello da Cultura Galega (1996- 2002) e mais do Centro PEN Galicia, Casares foi un intelectual de relevo extraordinario que destacou polo seu talento literario e tamén pola súa implicación na vida cultural, social e institucional do país, así como por unha laboriosidade incansable, ao tempo intelixente e reflexiva, sempre cun compromiso inequívoco coa lingua galega.