Michalis Kouloumis e Efrén López, "mestres" e músicos en Vigo

A Asociación Galicia Fiddle organiza este sábado 26 de maio unha masterclass e un concerto dos recoñecidos músicos Michalis Kouloumis e Efrén López.

Por primeira vez, este dúo formado por dous dos máis recoñecidos intérpretes no eido das músicas tradicionais mediterráneas do leste así como da música clásica Ottomana, achéganse a este que é o recanto máis occidental do continente nunha xira que aposta por locais íntimos e onde se valora a música en directo. Agora, tócalle a Vigo gozar da gran experiencia e sensibilidade de ambos músicos.

Másnoticias

Bouzas desvela los detalles de su mercado de Navidad para enamorar a Vigo

02/11/2025

Siete películas que puedes ver en la Fiesta del Cine en Vigo, que arranca a 3,50€ en cinco salas

02/11/2025

A masterclass, que comezará ás 20.00, terá unha duración de hora e media e nela darase unha introdución a música turca. Xusto despois, ás 22.00, os músicos amenizarán a velada cun concerto onde achegarán aos asistentes unha experiencia inesquecible a través de diferentes instrumentos de corda de terras lonxanas, interpretacións cargadas de achegas persoais e repertorios das principais culturas musicais modais nos que traspasan as fronteiras en prol da universalidade.

Nado no seo dunha familia de fonda tradición musical na illa de Chipre, Michalis Kouloumis desenvolveu unha forte sensibilidade musical dende ben novo. Hoxe é un dos máis importantes violinistas na escea da música clásica otomana e da música tradicional Grega, amplamente recoñecido polas súas habilidades improvisatorias baseadas no emprego da música modal e noutras técnicas especiais coma o diplochordo.

Ten publicado varios traballos discográficos con diferentes proxectos ademáis dun traballo en solitario titulado Soleil. Ten tamén colaborado con músicos da talla de Ross Daly, Zohar Fresco, etc.

Alcanzou o grao coa máxima condecoración en violín pola especialidade de música clásica otomana no conservatorio de Rotterdam e actualmente imparte a área de violín e improvisación modal no mesmo conservatorio.

Efrén López é un virtuoso músico multi-instrumentista, productor musical e enxeñeiro de son, nado en Valencia. Foi membro cofundador de L´Ham de Foc e participou en diversos proxectos no eido da música antiga e das músicas tradicionais de raíces mediterráneas. Tamén ten colaborado con destacadísimos artistas do panorama pop-rock nacional como Manolo García, Chambao, Soledad Jimenez, etc.

Ademais dos numerosos traballos discográficos colectivos nos que ten participado, ven tamén de editar o seu primeiro disco en solitario El Fill del Llop aclamado pola crítica internacional no eido da world music. Como ensinante destaca a súa involucración na Berklee College de Valencia, os seminarios Labyrinthos de Creta e diversos cursos e talleres modais por toda Europa.