O gran misterio do Entroido: que sucederá coa "batalla" entre A Feira e Castro Barreiro?

O Entroido da comarca de Vigo ten un dos seus grandes epicentros en Salceda de Caselas. O concello salcedense é un dos principais destinos galegos para gozar ao máximo esta festividade. O impacto da pandemia obriga a ter unha programación totalmente diferente. O Goberno que preside Loli Castiñeira aposta polo formato virtual para manter ese espírito de troula, pero un dos eventos que fai do Entroido de Salceda unha cita singular, o enfrontamento entre os barrios de Castro Barreiro e A Feira, está envolto dunha nube de misterio.

O gran derbi do Entroido da área de Vigo sempre foi un exemplo de resistencia. O enfrontamento entre Castro Barreiro e A Feira remóntase, cando menos, dende o ano 1.888, momento no que consta a primeira proba documental. Superou en todo este tempo todas as adversidades imaxinables, incluída a ditadura franquista, que non puido deter esta cita que ten un enorme arraigo en Salceda de Caselas e nos concellos de toda a contorna.

Másnoticias

Vigo pondrá un callejón del centro "patas arriba" con la verbena más popular con música y merienda

08/06/2026

Proyectan en Salceda un gran Centro de Negocios con oficinas, coworkings y salas de reuniones

05/06/2026

A pregunta é clara. Poderá o coronavirus deter a gran batalla do Entroido? Polo momento todo é un enigma, un misterio digno de ser resolto por Leo Caldas ou Sherlock Holmes. Na presentación da festividade salcedense, os representantes de Castro Barreiro e A Feira non quixeron avanzar nada. Predominan os segredos. Ninguén quere avanzar nada. O que parece claro é que o enfrontamento entre ambos barrios adaptarase á situación e ás restricións sanitarias e todo indica que haberá algunha sorpresa.

O enfrontamento entre os dous barrios é unha cita moi especial para Castro Barreiro e A Feira, que podería dicirse que xa viven e gozar do Entroido moito antes da batalla que ten lugar nas rúas de Salceda. O pequeno río que separa ambas zonas, o Regato da Ameixoa, convértese nunha fronteira, nunha forma diferente de interpretar o Entroido. Nos meses antes da festividade, crece a rivalidade, o misterio e incluso a espionaxe para saber que trama o eterno inimigo.

As veciñas e veciños de Castro Barreiro e A Feira traballan duro para que o seu espectáculo sexa mellor que o do seu adversario. Esa rivalidade chega á rúa incluso antes do propio desfile, á hora de criticar, con sátira, á programación de verbena do barrio veciño. Este derbi ten, como se diría agora, moito “salseo”, un “salseo” que temos moitas gañas de saber se tamén logra resistir aos duros tempos da pandemia.

Nas últimas edicións, Castro Barreiro e A Feira deron vida en Salceda de Caselas a propostas tan diversas como a historia de “Charlie e a fábrica de chocolate”, de Roald Dahl; á historia da película “Coco”, de Pixar; unha adaptación da serie “Game of Thrones” ou ás emerxentes redes sociais.

Por outra banda, o Concello de Salceda organiza a primeira edición do Concurso de Disfraces de Entroido co que dende a Concellería de Cultura animan á veciñanza a disfrazarse nas súas casas e non perder o espírito do Entroido. Para participar será necesario que as persoas interesadas envíen unha fotografía por enderezo electrónico a [email protected] ou por WhatsApp a través do teléfono 675 23 28 32.

Estableceranse tres categorías para os premios, individual, convivintes e votación popular, que contarán como premio un vale de compra de 100 euros para consumir nos establecementos do comercio local adheridos a ACISA (Asociación de Comerciantes e Industrais de Salceda). O xurado estará composto por representantes dos entroidos históricos da Feira e Castro Barreiro e polo técnico municipal de Mocidade.

A programación completarase con varias actividades virtuais, como diferentes obradoiros dirixidos á poboación infantil que se farán públicos nos vindeiros días, ademais de mostras de fotografías e vídeos dos entroidos de edicións pasadas.

A alcaldesa de Salceda, Loli Castiñeira, sinalou que "este é un ano difícil no que toca parar. Aproveitaremos o momento para avanzar no proxecto para que o noso entroido sexa declarado Festa de Interese Turístico de Galicia. Agora o primordial é a saúde, demasiada xente se quedou polo camiño, o Entroido e as festas xa voltarán, e farano con máis forza aínda”.