Moaña arranca dúas semanas de furanchos e folk co San Martiño

Viño e fartura para celebrar o San Martiño. Esta podería ser o lema oficial das festas grandes de Moaña que arrancan esta mesma fin de semana e se prolongarán até o domingo, 12 de novembro. As festas de San Martiño de Moaña, declaradas de Interese Turístico de Galicia, caracterízanse polo seu carácter enxebre e o roteiro de furanchos no que veciños e visitantes proban os viños da colleita a prezos populares. “Trátase duna festa moi especial na que moitos grupos de amigos reúnense con gaitas e bombos para percorrer os diferentes furanchos”, apunta o concelleiro de Cultura moañés, Salvador Meira.

Unha festa de gran peso popular que celebra este ano o 820º aniversario. Foi en 1197 cando, coincidindo co nacemento de Moaña como entidade de poboación, se celebraron por primeira vez.

Másnoticias

La Senda do Litoral de Bueu también se alza como una de las rutas “top” para hacer senderismo en España

05/02/2023

Moaña presenta seis rutas guiadas e de balde entre natureza e historia para comezar o ano

01/02/2023

Ás 20:00 horas desta noite de venres, 3 de novembro, os furanchos abrirán as súas portas para dar comezo a unha noite de esmorga que se alongará durante estas duas fins de semana. En total, a organización autorizou a 15 furanchos, entre os situados en casetas e carpas e os que se atopan nos baixos das casas, que estarán na zona do Adro Baixo e no aparcadoiro da antiga Rectoral de San Martiño, hoxe Escola de Música.

O día grande das festas chegará o sábado, 11 de novembro, cunha programación festiva que comezará as 10:00 horas e rematará coas verbenas das orquestras Televisión e Pontevedra. Nesta xornada haberá un servizo de autobús especial que sairá dende a Igrexa de Domaio ás 10:00, 11:00, 17:00, 19:00 e 21:00 horas, con recollida e baixada de pasaxeiros nas habituais paradas. O regreso será ás 14:30, 18:00, 20:00, 22:00, 0:00 e 02:00 horas.

Folk para a mocidade

Dentro da programación das festas de San Martiño, o Concello organiza o Día da Xuventude o xoves, 9 de novembro. “Buscamos celebrar unha xornada coa nosa música tradicional e grupos de folk”, apunta o concelleiro de Cultura. Así, dende as 20:00 horas arrancará a actuación dos Gaiteiros de Moaña, Pelexo de Ghaita, Fol-k Coiro e Fanfarria Taquicardia.