Desconvocada a folga de Vitrasa prevista para decembro

O comité de Vitrasa, concesionaria do servizo de transporte urbano do Concello de Vigo, acordou onte desconvocar os paros parciais cuxo inicio estaba previsto para hoxe unha vez que a empresa "deu marcha atrás na modificación substancial das condicións de traballo e accedeu a restablecer as xornadas completas que decidira partir para reforzar as liñas co obxectivo de cumprir as limitacións de aforo impostas pola pandemia".

O acordo, que chegou tras sete horas de negociación, establece que a empresa retomará a partir de hoxe mesmo os servizos modificados o pasado 12 de novembro para que o persoal afectado poida volver á súa xornada habitual. Nos casos nos que non sexa posíbel facelo de xeito inmediato fíxase un prazo non superior a 24 horas.

Másnoticias

Cómo ver en Galicia la "luna de sangre", el eclipse lunar total de este domingo

06/09/2025

Así reabrirá una tienda del centro de Vigo con una apuesta por las camisetas retro de fútbol

06/09/2025

Tamén contempla a contratación de seis traballadores a tempo parcial para cubrir os reforzos necesarios nas liñas co obxectivo de cumprir as limitacións de afora impostas pola crise sanitaria. Estas contratacións serán de duración determinada, de luns a venres e con descanso en fin de semana, a xornada partida e a tempo parcial, tendo a única interrupción da xornada como mínimo durante dúas horas de descanso consecutivas entre as 11:00 e as 17:00 horas. A duración dos contratos terá como data límite o mantemento das limitacións de aforo, ou como moi tarde até o vindeiro 8 de xaneiro.

Dende o comité de empresa Vitrasa, presidido pola CIG, valoran positivamente o feito de que quede sen efecto a modificación das condicións de traballo imposta pola empresa, de xeito que o cadro de persoal recupera a súa xornada laboral habitual. Con todo, consideran "insuficiente" que a contratación sexa parcial e non a tempo completo e lembran que os traballadores da concesionaria do transporte urbano vigués seguen a facer "un número moi elevado de horas extra".