Máis de 2.000 persoas concentráronse este domingo en Moaña para clamar contra o “abandono” do Sergas á poboación do municipio morrancense. A Xunta eliminou o servizo de urxencias ao comezar o estado de alarma para centralizar os servizos en Cangas. Unha vez finalizou, Moaña quedo usen recuperalas. Esta foi a última medida que colmou a paciencia dos veciños e veciñas que levan décadas clamando pola mellora da asistencia primaria nun municipio que non conta coa infraestrutura necesaria e centraliza a atención na Casa do Mar.

A rexedora local, Leticia Santos, lamenta que a veciñanza debe acudir a urxencias a Cangas, “que non ten capacidade suficiente para atender a todos os pacientes, hai xente que espera na porta, fora do edificio, para poder ser atendido”, censura a alcaldesa.

O pleno municipal aprobou esta pasada semana una moción para esixir ao Sergas a restitución do servizo, pero non é a única deficiencia que padecen. As listas de espera de atención primaria telefónica suman máis de 21 días. O goberno municipal tamén esixe que se acelere a construción do centro de saúde que, tras anos de atrancos, foi ao fin aprobada despois das eleccións municipais. “Firmamos un convenio cando a Xunta lle interesou con catro anos de retraso porque non quixeron fírmalo pensando que ían ter réditos políticos nas municipais”, explica Santos que engade que “nos si o firmamos cando eles quixeron porque non buscamos réditos políticos”.

Os asistentes á concentración deste domingo, que se suma as concentracións semanais que se fixeron durante máis dun ano até o estalido da pandemia, consideran que a situación é xa “insostible”. Denuncian que no Morrazo o Sergas conta soamente con tres ambulancias, unha en cada concello, unha cifra insuficiente para a poboación que atenden. “Nas fins de semana van facer servizos a outros concellos e cando acoden quedamos sen ninguén”, explican. Por isto, pídese tamén sumar unha ambulancia medicalizada. “Se tarda unha hora é mellor que de a volta e que veña unha funeraria”, expresa a alcaldesa de Moaña que non entende que a Xunta “reduza a atención primaria en plena pandemia deixando a poboación ante un maior risco”. Por iso, o pleno municipal pediu tamén que se recupere a atención presencial xa que entenden que a telefónica “ten que ser residual e complementaria, e nunca a opción principal”.

A concentración deste domingo contou coa presenza da actriz María Salgueiro, encargada da lectura do manifesto no que se explicaba que “o que está a pasar agora na Casa do Mar é unha verdadeira vergoña e un insulto á cidadanía”. Tamén se lembrou ás dúas persoas falecidas fai sete días na Praia da Xunqueira. “No segundo caso, as ambulancias de Moaña, Cangas e Bueu estaban ocupadas, tendo que achegarse ata a praia unha ambulancia doutra localidade que tardou en chegar 20 minutos, máis tarde, traídas por Protección Civil de Cangas, chegaron 1 médica e 1 enfermeira do PAC. E máis de 45 despois de comezar os socorristas as labores de reanimación da bañista falecida, chegou a ambulancia medicalizada”.

A alcaldesa de Moaña enviou unha carta o pasado 27 de xuño a conselleiro de Sanidade, Jesús Vázquez Almuiña, explicando a situación e pedindo que se cumpran as peticións. A resposta aínda non chegou ao Concello.

No es un pueblo que se movilice masivamente, pero aquí hay cientos de vecinos protestando porque NO hay urgencias, la atención es esencialmente por teléfono, como ha defendido @FeijooGalicia debe ser la asistencia sanitaria "del futuro" pic.twitter.com/2Ia4XrJNgR

— Andrea Nogueira (@Andre_Nogue) August 2, 2020