A Universidade de Vigo lidera un proxecto europeo centrado no fortalecemento do agroturismo

Fortalecer o agroturismo mediante clústeres intelixentes que integren patrimonio cultural inmaterial, prácticas agrícolas sostibles e mercadotecnia dixital avanzada. Con este obxectivo bota a andar TourisFarm, un proxecto con financiamento europeo no que participan socios académicos e empresariais de cinco países liderados desde a Universidade de Vigo.

Ademais da UVigo forman parte do consorcio de TourisFarm outras tres universidades europeas, como son a Università degli Studi di Padova (Italia); o Porto Business School, da Universidade de Porto (Portugal) e a Univerza na Primorskem-Università del Litorale (Eslovenia). Tamén participan dúas empresas: a empresa de tecnoloxía FeedYou SRO (República Checa) e a consultora de gobernanza territorial e desenvolvemento sostible Sherpa SRL (Italia). O equipo da Universidade de Vigo que lidera a iniciativa está formado por Diego R. Toubes (coordinador principal), José Antonio Fraiz e Noelia Araújo, persoal docente e investigador da Facultade de Ciencias Empresariais e Turismo do campus de Ourense, membros do Centro de Investigación Interuniversitario das Paisaxes Atlánticas Culturais (Cispac) e do grupo de investigación da UVigo Organización e Comercialización (OC2). A iniciativa forma parte e dá impulso á liña de traballo deste equipo en turismo rural sostible.

Másnoticias

El fotógrafo de Vigo que conquista a España con la imagen de un fotomatón

03/06/2026

Ni soja ni avena, la UVigo avanza para crear bebidas vegetales 100% gallegas con castaña o fabas

28/05/2026

TourisFarm ten unha duración de tres anos e un orzamento total de 400.000 euros, senso seleccionado e financiado pola convocatoria de proxectos Erasmus+ KA220-HED. Cooperación entre Organizacións e Institucións, da Unión Europea. A xornada de lanzamento da iniciativa celébrase estes días no campus de Ourense, contando coa participación presencial de socios de España, Eslovenia, Italia e República Checa e coa participación virtual dos demais membros. Na súa apertura, a delegación da UVigo amosou a súa satisfacción por liderar este proxecto, subliñando del o seu enfoque nun desenvolvemento rural sostible e tamén pola oportunidade que ofrece o programa Erasmus+ “de crear vínculos e compartir coñecementos, establecer lazos e pontes con outras universidades e empresas de Europa”. Alén do traballo no campus de Ourense, a xornada, que conta co apoio da Oficina de Proxectos Internacionais da UVigo, inclúe a visita a iniciativas rurais en Allariz e Verín ás que se unirán tamén alumnado do mestrado e do programa de doutoramento en Turismo da Universidade de Vigo.

Obxectivos e actividades previstas

Os principais obxectivos de TourisFarm son: codeseñar e pilotar un currículo aberto en turismo rural sostible e dixital para institucións de educación superior e pemes; desenvolver ferramentas dixitais para a comercialización responsable; establecer clústeres agrícolas piloto en dúas zonas transfronteirizas (España-Portugal e Italia-Eslovenia) para mellorar os ingresos locais, preservar as tradicións e aumentar a resiliencia climática; e formular recomendacións baseadas na evidencia para promover o turismo rural sostible, inclusivo e resiliente.

TourisFarm, sinalan as entidades promotoras, “entende a dixitalización non só como unha mellora da competitividade, senón sobre todo como formación e empoderamento do tecido empresarial e rexional, centrándose nas persoas e nas pequenas empresas”. Un elemento clave neste senso, engaden, “é o desenvolvemento de módulos educativos para estudantes de institucións de educación superior (IES) e persoal de granxas e aloxamentos rurais, centrados no desenvolvemento rexional sostible, o turismo rural intelixente e a integración do cambio climático”.

Concretamente, as actividades previstas no proxecto agora lanzado inclúen o despregamento de plataformas dixitais, formación en prácticas sostibles e obradoiros para alumnado e partes interesadas locais. Como resultado do seu traballo, TourisFarm ofrecerá currículos actualizados, módulos de formación, solucións de mercadotecnia dixital (chatbots de IA e experiencias XR) e clústeres piloto de agroturismo. A longo prazo, sinalan desde a organización do proxecto, “espérase que estes resultados enriquezan as ofertas das organizacións participantes, contribúan ao fortalecemento das comunidades rurais, promovan a preservación do patrimonio inmaterial e proporcionen ferramentas innovadoras para abordar os desafíos climáticos, fomentando así o desenvolvemento turístico sostible e intelixente”. TourisFarm, engaden por último, “pretende ser o embrión dunha secuencia de proxectos similares que involucren a outras áreas transfronteirizas da UE nas que as afinidades recomendan a integración en eidos da economía, a cultura e os medios de vida”.