Zancadas solidarias polas víctimas da explosión de Tui

Este domingo celebrarase a VII Eurocidade 10 organizada pola Eurocidade Tui-Valença e o Club Atletismo Tui. Esta proba de atletismo será solidaria cos afectados de Paramos, para quen será recadación íntegra da proba, pero amais poranse á venda, o mesmo domingo, camisetas solidarias ao prezo de 5 euros.

A presentación deste evento deportivo tivo lugar o pasado luns na Casa do Concello de Tui coa presenza do alcalde, Carlos Vázquez Padín, o concelleiro de Deportes, Andrés Urseira, o vereador de Desporto de Valença, José Monte, e o presidente do club Atletismo Tui, Rafael Pérez.

Másnoticias

Tui inicia los pasos burocráticos para construir un nuevo puente sobre el Cotarel

07/12/2023

Colas kilométricas para entrar en Portugal desde Tui en el primer festivo del puente de diciembre

06/12/2023

O alcalde de Tui, Carlos Vázquez Padín, destacou na súa intervención a triple vertente desta actividade deportiva, patrimonial e solidaria. No mesmo senso o concelleiro de Deportes, Andrés Urseira, salientou que este evento, que é unha das probas estrelas do calendario deportivo da Eurocidade, aportará o seu gran de area aos afectados pola catástrofe de Paramos. Ao tempo ten tamén valor deportivo e visibiliza a Eurocidade co percorrido polo corazón do conxunto histórico de Tui e a fortaleza de Valença.

Pola súa parte, José Monte, vereador de Desporto de Valença, transmitiu a solidariedade do municipio de Valença con Tui, colaborando dende o primeiro momento, e indicando que este ano todos temos que facer un esforzo na divulgación desta proba.

Mentres Rafael Pérez, presidente do Club Atletismo Tui, indicou que esta sétima edición ten un matiz especial debido aos acontecemento de Paramos, xa que o 100% da inscrición será destinado á Plataforma de Afectados. Lembrou amais Rafael Pérez que o Club Atletismo Tui Thermalia sempre estivo comprometido a nivel social e solidario, e en todas as carreiras hai un compoñente social e solidario. En concreto na Eurocidade destinaban o 10% de inscrición a unha entidade de carácter social, pero este ano acordaron doar o 100%. Amais da inscrición, a entidade vai desenvolver coa colaboración do Concello e da Cámara de Valença, outras accións paralelas. Así a camiseta da proba, que se entrega a todos os participantes, levará #TodosconParamos e un lazo para lembrar ás vítimas da traxedia. Esta camiseta porase á venda cun valor simbólico de 5€ que se poderá mercar o domingo nas inmediacións da saída. Lembrou tamén que os trofeos da proba son realizados por unha organización de ámbito social sen ánimo de lucro como é Avelaíña.

Xa no eido deportivo explicou que a Eurocidade 10 é unha carreira pedestre que transcorre fundamental por asfalto na que se aproveitan os recursos patrimoniais e paisaxísticos de Tui, do Miño e de Valença, que conta co atractivo engadido de atravesar a vella Ponte Internacional.

A saída da VII Eurocidade 10 terá lugar este domingo, 10 de xuño, ás 11:00 horas dende o Paseo da Corredoira. Os participantes terán que percorrer os 10 quilómetros do circuíto establecido que atravesando a vella Ponte Internacional e regresando ao punto de partida en Tui.

A inscrición para a Eurocidade 10 está aberta ata este xoves, 7 de xuño, ás 23:59 horas na plataforma Championchipnorte para os atletas españois e Lap2go para os portugueses. O prezo da inscrición é de 4 euros que serán doados integramente á Plataforma Axuda Paramos. Os atletas que non posúan o chip amarelo deberán alugalo cun custe dun euro. Agardan superar os 300 atletas que participaron o ano pasado na proba.

Establécense premios para os gañadores absolutos, para os tres primeiros e as tres primeiras de cada categoría, sub23, senior e veterano A e B, e para os tres primeiros e tres primeiras atletas da Eurocidade.