A Deputación lanza axudas a concellos para garantir o abastecemento de auga ante a seca

O Goberno da Deputación de Pontevedra presentou este xoves unha nova liña de axudas extraordinarias aos concellos de menos de 20.000 habitantes para que poidan actuar se a situación de seca, que afecta xa a diferentes zonas da provincia, se mantén no tempo e chega a comprometer o abastecemento de auga domiciliaria. A presidenta provincial, Carmela Silva, e o vicepresidente, César Mosquera, deron detalles desta iniciativa que estará dotada con tres millóns de euros e que está destinada aos concellos, entidades locais ou mancomunidades, que teñen a obriga de garantir o abastecemento. A Deputación de Pontevedra convértese na primeira administración provincial de Galicia en lanzar estas axudas extraordinarias pola seca e na máis ambiciosa do Estado en canto aos recursos que se van mobilizar.

As bases desta liña de axudas se levarán ao pleno de setembro e con esta medida a Deputación “anticípase ao que poida acontecer se seguimos nesta situación”, en palabras da presidenta provincial, Carmela Silva. A institución remitiu hoxe unha carta na que se convida aos gobernos locais a facer achegas en canto as casuísticas que teñen cada un deles. A presidenta provincial cualificou esta iniciativa como “unha decisión novidosa, potente e con recursos moi por riba doutras administracións”.

Másnoticias

El Castillo de Soutomaior brilla por Navidad y ya ofrece visitas teatralizadas para diciembre

02/12/2024

La Diputación aprueba cinco millones de euros para Vigo: estas son las obras que pagará

29/11/2024

Pola súa banda, o vicepresidente provincial, César Mosquera sinalou que a Deputación reafírmase como “o concello dos concellos” nunha situación de prealerta por seca na que algúns municipios xa tiveron que facer restricións. “Nin os concellos nin nós podemos facer as cousas de maneira ordinaria, con toda a burocracia que iso supón, porque as medidas aplicaríanse en febreiro e queremos que sexa xa”.

A contía máxima de subvención será un fixo de 10.000 euros para cada concello, entidade ou mancomunidade, mais a resultante de multiplicar por 5 o número de habitantes da administración local que solicita a axuda, “respondendo unha vez máis, dixo a presidenta, a un reparto equitativo co criterio obxectivo poboacional”. No caso das Mancomunidades será para actuacións en concellos de menos de 20.000 habitantes e no caso de actuacións conxuntas para a parte proporcional segundo a poboación que corresponda a concellos de menos de 20.000.

As actuacións subvencionables  con esta liña de axudas extraordinarias, que se concederán por concorrencia non competitiva, serán todas aquelas de emerxencia destinadas a garantir o subministro de auga a toda a poboación, estea cuberta polo sistema público ou por solucións individuais ou colectivas diferentes ao sistema público e poderán ser de gasto corrente ou investimento. Entre elas estarían o enchido de depósitos mediante cisternas, puntos de achega mediante cisternas, eliminación de fugas puntuais no sistema de captación e distribución, novas captacións de emerxencia como pozos de barrena, conexións puntuais a outras redes por emerxencia, limpeza de captacións, campañas informativas de moderación de consumo, gastos derivados de bombeos extraordinarios e urxentes e outras similares.

Non serán financiables obras de mellora xeneralizada ou de ampliación das actuais redes, que terían que afrontarse por procedementos ordinarios. En todo caso, o listado de actuacións que serían subvencionables está aberto en funcións das achegas que poidan facer chegar os concellos.