A investigadora da UVigo Lucía Cassani acada o premio Young Investigator Award

A investigadora da Universidade de Vigo Lucía Cassani acaba de ser galardoada co premio Young Investigator Award, un recoñecemento anual da revista Foods (MDPI). Este galardón outórgase desde 2021 a investigadoras e investigadores posdoutorais en etapas iniciais da súa carreira pero que destacan pola súa excelencia e contribucións innovadoras na área da ciencia dos alimentos.

Foods atópase no Journal Citation Reports (JCR) na categoría Food Science and Technology, posicionada no primeiro cuartil (Q1). O xurado do seu premio Young Investigator Award, composto por seis especialistas internacionais, avalía que as e os candidatos desenvolvesen unha investigación orixinal e de impacto, achegando avances significativos ao progreso da disciplina considerada. O galardón está dotado cun premio en efectivo de arredor de mil euros.

Másnoticias

A UVigo comeza a escavación dunha antiga necrópole situada no propio campus universitario

04/09/2025

La ciencia llega al centro de Vigo con actividades gratuitas para todos los públicos

03/09/2025

“Para min é unha verdadeira honra ser distinguida co Young Investigator Award de Foods, un premio que non só recoñece a miña traxectoria investigadora, senón que tamén representa unha gran motivación para seguir impulsando o desenvolvemento de novas estratexias de formulación de alimentos funcionais, a identificación de ingredientes con beneficios para a saúde e a aplicación de solucións sostibles na industria alimentaria”, sinala Lucía Cassani. Esta distinción internacional, engade, “favorecerá o establecemento de novas colaboracións, ampliando a miña rede científica e dando maior visibilidade á investigación galega”. A investigadora da UVigo sinala ademais que “recibir este premio reforza o meu compromiso de continuar contribuíndo a unha ciencia dos alimentos máis innovadora, responsable e orientada ao benestar da sociedade”.

Compromiso coa innovación sostible en alimentos

Lucía Cassani é investigadora do Grupo de Investigacións Agrarias e Alimentarias (AA1), no Departamento de Química Analítica e Alimentaria da Universidade de Vigo, onde desenvolve o seu traballo desde 2021. A súa investigación céntrase na extracción verde de compostos bioactivos a partir de subprodutos agroalimentarios, co fin de reintroducilos en alimentos, mellorar o seu perfil nutricional e estudar os seus efectos sobre a microbiota intestinal, contribuíndo ao mesmo tempo á redución de residuos e ao uso eficiente de recursos.

Doutora en Enxeñaría pola Universidad de Buenos Aires, Arxentina, Lucía ten un perfil internacional baseado en estadías, colaboracións en redes e participación en proxectos financiados en Arxentina, España e a Unión Europea. Obtivo diversas bolsas e axudas competitivas, entre elas dúas axudas posdoutorais da Xunta de Galicia; conta con máis de 50 publicacións indexadas, 10 capítulos de libro e máis de 30 comunicacións en congresos internacionais. Ademais, foi editora invitada en seis números especiais de revistas internacionais. Actualmente, lidera desde a UVigo dous proxectos autonómicos e participa nos proxectos internacionais liderados polo catedrático desta institución académica Jesús Simal, compaxinando o seu labor investigador coa docencia e a divulgación científica, e “sempre cun forte compromiso cara a innovación sostible en ciencia e tecnoloxía dos alimentos”.