A UVigo axudará ás pemes galegas na dixitalización e aplicación de intelixencia artifical

A Universidade de Vigo e o centro de investigación atlanTTic son dous dos socios do proxecto EDIH DATAlife, o único Hub de Innovación Dixital galego que recibe apoio económico da Comisión Europea. Unha vez acadado este selo de excelencia, o proxecto botou a andar a comezos deste ano cunha duración de tres anos e un orzamento total de case 5,5 millóns de euros, dos cales o 50% serán cofinanciados pola CE e, o resto, polo Ministerio de Industria, Comercio y Turismo.

Coa participación de 15 socios, o obxectivo común é acelerar a dixitalización e aplicar intelixencia artificial e big data nas empresas, fundamentalmente das pemes, que desenvolven a súa actividade nalgunha das catro cadeas de valor estratéxicas de Galicia e de DATAlife: agro-mar alimentación, biotecnoloxía, forestal-madeira e saúde-coidados.

Másnoticias

O tour Alerta Verde leva a divulgación científica a preto de 3500 persoas en toda Galicia

16/07/2026

O CIM analiza se a alcalinización dos océanos é segura para a vida mariña con maior temperatura da auga

16/07/2026

EDIH DATAlife (Digital Innovation Hub for the deployment of Artificial Intelligence and Data Analytics in SMEs in the primary, biotechnological and health sectors) conta coa participación das universidades de Vigo e Santiago, Feuga, Anfaco, Gradiant, Cesga, varios clústeres sectoriais e a empresa Televés. Do orzamento total de 5,5 millóns de euros, 522.000 euros corresponden á Universidade de Vigo, cun financiamento europeo de 261.000.

Biorrexión de referencia en Europa

O proxecto nace coa misión de converter Galicia en biorrexión de referencia en Europa mediante a posta en contacto, coordinación e creación de sinerxías entre os axentes do ecosistema de innovación e os sectores produtivos. Trátase de axudar a mellorar a competitividade das empresas galegas introducindo tecnoloxías disruptivas como a intelixencia artificial, o big data, o internet da cousas, a computación de altas prestacións e a ciberseguridade; ademais da creación de espazos colaboradores e federados. En resumo, o consorcio busca dinamizar o ecosistema de innovación galego, facilitando o acceso a financiación, promovendo a formación en dixitalización e fomentando que as empresas proben este tipo de tecnoloxías sen custe.

Deste xeito, DATAlife converterase nunha fiestra única de acceso a servicios especializados e innovadores de carácter tecnolóxico, formativo e de desenvolvemento de negocio; tecnoloxías e infraestruturas de última xeración de uso compartido a disposición do ecosistema; e actividades de coordinación do ecosistema de innovación arredor das tecnoloxías dixitais.

Como explica o director de atlanTTic e IP do proxecto na UVigo, Martín Llamas, o obxectivo é “a adopción por parte das PEMEs do big data, as tecnoloxías de IA, a computación de altas prestacións e a ciberseguridade, entre outras, xa que estas tecnoloxías lles permitirán aumentar a súa competitividade nun mercado cada vez máis esixente”. Para conseguir esta transformación dixital do tecido económico, universidades, centros tecnolóxicos e de competencias, clústeres sectoriais e grandes empresas traballarán xuntos para crear unha contorna xusta, verde e saudable adaptada á era da información.

Implicación da UVigo e de atlanTTic

Dentro deste proxecto, a UVigo forma parte do paquete de traballo Ecosystem & networks, encargándose das tarefas relacionadas coa transferencia de coñecemento e tecnoloxía. Pola súa banda, o centro de investigación atlanTTic está centrado no paquete Test Before Invest, que comprende tarefas como o desenvolvemento de tecnoloxías para a mellora da ciberseguridade; o desenvolvemento, proba, validación e demostración de tecnoloxías dixitais e a investigación, desenvolvemento e posta en marcha de tecnoloxías dixitais adaptadas as necesidades sectoriais.

Outro paquete no que participa atlanTTic é Digital Training & Skills, centrado no deseño dunha metodoloxía para a formación baseada no análise de necesidades dos sectores e tecnoloxías xa mencionadas. Ademais, tanto UVigo como atlanTTic participan xunto con todos os socios nos paquetes de coordinación e xestión e de comunicación e diseminación.