Arranca en Vigo un proxecto que busca “solucións transformadoras” para acadar a resiliencia climática

A crise climática trae consigo inmensos desafíos para a sociedade e para combater eses retos necesítase desenvolver a chamada resiliencia climática, medidas coas que facer fronte ás realidades dun mundo máis cálido. Neste contexto, este mércores arrancou en Vigo o proxecto europeo Farclimate, financiado con 4,6 millóns de euros e no que participan 14 socios de cinco países, coordinados desde a Universidade de Vigo polo profesor Pablo Cabanelas, responsable do grupo de investigación Organización do Coñecemento (OE7), conformado principalmente por persoal investigador do ámbito económico e empresarial, así como do eido estatístico.

Estes 14 socios buscarán de maneira conxunta “solucións transformadoras para tratar de entender os cambios que poden vir nos próximos anos asociados ao clima”, tal e como explicou Cabanelas na reunión de lanzamento do proxecto, un encontro que se prolongará ata mañá xoves no edificio Redeiras e que contou tamén coa participación do reitor da Universidade de Vigo, Manuel Reigosa, que foi o encargado de darlle a benvida aos participantes. “Se ben para min hoxe é difícil estar feliz, dado os últimos acontecementos que están a acontecer a nivel internacional, é un orgullo para a nosa Universidade coordinar un proxecto destas características”, subliñou o reitor, quen afondou na idea de que a sociedade terá que realizar importantes cambios para adaptarse ás múltiples consecuencias que o cambio climático trae consigo. “O voso papel será moi importante en todo este proceso, xa que nos ides prover de ferramentas útiles coas que adaptarnos a un cambio global que xa está aquí”, recalcou Reigosa.

Másnoticias

Arranca na UVigo unha nova edición do Tándem Lingüístico tras o éxito do pasado curso

18/11/2024

¿Cómo habla Vigo? La Universidad recoge 400 refranes y palabras propios de la ciudad

13/11/2024

“Especial atención” ás barreiras políticas, sociais e económicas

Todas as accións que se leven a cabo baixo o paraugas Farclimate, Moving ForwARd to achieve CLIMATE -resilient and sustainable European regional economic system-, irán dirixidas á consecución de sistemas económicos rexionais europeos sostibles e resilientes ao clima. Realizaranse actividades en, cando menos, 20 rexións e comunidades europeas e todas irán dirixidas a “abordar os difíciles retos de desenvolver e ampliar as medidas de resiliencia climática, facéndoas accesibles e compresibles para todos”, explicou o coordinador, ao que engadiu que se prestará “especial atención” ás barreiras políticas, sociais e económicas que xorden habitualmente arredor de todas estas cuestións.

Ademais de encargarse da xestión xeral do proxecto, a Universidade de Vigo liderará o paquete de traballo específico sobre caracterización dos casos prácticos e, a maiores, “terá un rol relevante noutras tarefas”, entre elas a definición dun enfoque metodolóxico que permita identificar os casos de estudo e definir plans de xestión resilientes ante o cambio no clima e a folla de ruta sobre estratexias políticas.

14 “grupos potentes” do eido público e privado

“Nesta viaxe non imos solos, hai grupos potentes que nos acompañan nesta aventura que acaba de comezar”, explica Pablo Cabanelas, quen salienta que os 14 socios implicados proveñen do eido público e privado. Dados os campos temáticos de estudo, cóntase con especialistas no eido forestal (CESEFOR), agrícola (Universidade de Lieja) e marítimo (Fundamar). O ámbito académico complétase coa Universidade Nova de Lisboa. A maiores o equipo inclúe especialistas en Living Labs, coma ENoLL o Green Growth Generation, ademais de dous Living Labs de Finlandia (Laurea) e Grecia (CERTH), e a Cámara Municipal de Fundao. “Todos estes grupos estarán complementados por organizacións privadas especialistas en temas medioambientais, formación e plataformas dixitais, coma Contáctica, Inviable e C4G”, apunta o coordinador, quen tamén menciona que, ademais de todo o anterior, o proxecto conta como asociado coa Unión Internacional da Conservación da Natureza (UICN), un dos grandes referentes en aspectos medioambientais.

“Entre todos conformamos un equipo multidisciplinar e con grandes complementariedades”, explicou na xuntanza o coordinador, quen se amosou convencido de que “sairán moitas achegas de interese”.