As obras no novo centro de saúde situado nos xulgados da rúa Lalín comezarán este ano

A Xunta de Galicia vén de presentar este sábado a reforma dos antigos xulgados da rúa Lalín que se convertirán no centro de saúde integral Olimpia Valencia, co que o Sergas busca unificar a atención sanitaria do barrio vigués das Travesas e incrementar a carteira de servizos de atención primaria. O futuro centro levará o nome de Olimpia Valencia, a primeira doutora galega e figura que rescatou en 2019 do esquecemento a xornalista Ana Fuentes.

No transcurso desta presentación, o conselleiro de Sanidade, Julio García Comesaña, asegurou que a nova infraestrutura sanitaria vaise acometer este ano, para o que xa está consignado 1 millón de euros dirixido á licitación e inicio da obra. O futuro CIS, que emprazarase no antigo edificio dos xulgados da rúa Lalín unha vez trasladados estes á Cidade de Xustiza- e beneficiará a unha poboación de 42.000 persoas.

Másnoticias

Vigo acoge una de las manifestaciones más numerosas de Galicia del 25N: "Juntas somos más fuertes"

25/11/2025

Vigo 'desbloquea' más de 10.000 m2 en Samil para un proyecto comercial y residencial con parque lineal

25/11/2025

O obxectivo fundamental da nova infraestrutura é, segundo explican dende o Sergas, substituír ao centro de saúde de López Mora, que está "obsoleto", presentando unhas condicións estruturais precarias, cunha evidente limitación espacial que condiciona o seu crecemento e desenvolvemento.

O novo centro permitirá completar a carteira de servizos de Atención primaria e dotar a esa zona daquelas prestacións que a día de hoxe non están dispoñibles en ningún dos seus centros de saúde como Fisioterapia, Odontoloxía e Farmacia .

Novas prestacións sanitarias

O proxecto presentado hoxe contempla unha superficie de 7.370 m² construídos que será distribuída en seis plantas. Ademais dos servizos básicos de Medicina de Familia, Pediatría, Enfermería, Telemedicina e imaxe médica, Cirurxía menor, Sala de técnicas de alta resolución de Enfermería, Ecografía, Traballo social e Matrona, contará coas novas prestacións de Fisioterapia, Farmacia e Saúde bucodental. Ademais, contará tamén cunha base do 061.

Así, segundo describe a proposta arquitectónica, incluirá os seguintes espazos:

• Área de Recepción: con 8 postos de recepción/citación, despacho administrativo, almacén de cadeiras de rodas e padiolas, 1 consulta de urxencias e sala de observación de urxencias.
• Área de Atención Clínica: 20 consultas de medicina xeral, 20 de enfermería, 1 de farmacia, 6 gabinetes polivalentes, 1 sala de extraccións, 2 salas de técnicas.
• Área de Pediatría: 8 consultas de pediatría, 8 de enfermería pediátrica, 1 sala de atención, 1 sala de lactancia.
• Área de Atención á muller: 2 consultas, 1 aula preparación de parto, almacén e vestiario para a aula.
• Área de Docencia: 2 consultas de docencia MIR, 2 consultas de docencia enfermería.
• Área de Saúde Bucodental: 1 consulta odontólogo, 1 consulta hixienista dental.
• Área de Rehabilitación: 2 Consultas fisioterapia, 6 Cabinas de tratamento, 1 Ximnasio de fisioterapia, e 2 vestiarios.
• Área de Telemedicina: 1 Sala de sistemas avanzados de telemedicina
• Outras Áreas: 2 Consultas de Asistencia social, 2 Despachos coordinación, 1 Almacén de dispensación de farmacia ambulatoria, e 2 Vestiarios.
• Área de Persoal: 1 Sala de xuntas/biblioteca, 1 Sala de estar de persoal

O número de profesionais do CIS será de 90 (o persoal dos servizos de primaria actuais que se integrarán no novo centro, máis o que corresponderá á atención ás novas prestacións) e o seu horario de funcionamento irá de 8.00 a 22.00 horas, facilitando así aos profesionais a conciliación coa vida familiar, ao posibilitarlles a realización de quendas deslizantes ou rotatorias.

A ampla capacidade prevista para a nova infraestrutura sanitaria permitirá "liberar espazos doutros centros de saúde cando sexa necesario", argumentan dende o Sergas, atendendo á demanda poboacional, a incrementos de recursos -tanto humanos como materiais-, ou a incorporacións de novas prestacións.