O BNG chama a corrixir a sinalización das rúas de Vigo que aínda non están en galego

O BNG vén de denunciar os "numerosos exemplos" de vías da cidade olívica que incumpren a Ordenanza municipal de Normalización Lingüística, que fixa o galego como idioma do rueiro vigués.

Así o esixiu este venres a concelleira do BNG, Ana Martínez, quen lamentou que persistan na rede viaria da cidade un importante número de sinalizacións en castelán, algunhas de creación recente. Dende a formación poñen como exemplo a Carretera de Miraflores, Carretera da Ponte de Segade, Subida a la Cuesta, Subida al Castillo, Carretera de Bembrive, Orense, Bayona ou Vizcaya. “Estes son só algúns dos topónimos deturpados que se poden ler nas rúas, estradas, camiños e paradas de autobús da nosa cidade”, subliñou.

Másnoticias

Cierra el local que revolucionó el mundo de las hamburguesas en Vigo: sus últimos días

04/04/2025

Fiestas gastronómicas, conciertos y mercadillos en el primer fin de semana de abril en Vigo y área

04/04/2025

Diante desta situación, Martínez demandou que o Goberno municipal "actúe para corrixir estas rotulacións", tanto as de responsabilidade municipal como as que dependen de outras administración, así como a ter en conta esta normativa no seu plan de renovación das sinalizacións viarias. “Estes elementos perduran no tempo e son a imaxe do concello”, valorou a concelleira nacionalista, reivindicando un Vigo "orgulloso da lingua galega e que contribúa activamente a fomentar o seu uso na cidade".

Dende a fronte nacionalista consideraron que non chega con que o alcalde, Abel Caballero, utilice o galego de “xeito anecdótico e ritual” durante o Día das Letras Galegas. “O Concello de Vigo ten que amosar o seu compromiso total coa plena normalización da nosa lingua na maior cidade de Galiza”, defendeu Martínez. “E iso pasa por usar o noso idioma en todos os contextos, tanto orais coma escritos, por parte de todos os concelleiros e concelleiras na súa relación coa cidadanía, cos medios de comunicación, e tamén na cartelaría e sinalizacións viarias”, remachou.