O BNG de Vigo volve pedir a Caballero que retire o alumeado de Nadal da araucaria da Alameda

O Bloque Nacionalista Galego pide retirar dunha vez os adornos de Nadal pendurados da centenaria araucaria da Alameda de Vigo. A fronte nacionalista reitera a esixencia de retirar o alumeado desta árbore singular, cinco meses despois do remate das festas, e pregunta ao alcalde se hai que acudir ao Seprona para facer cumprir a normativa medioambiental.

“É unha situación delirante que non se pode deber a unha neglixencia na xestión, non hai un goberno tan incompetente que explique que a día 30 de maio continúen penduradas da araucaria as luces do Nadal anterior”, criticou o concelleiro do BNG de Vigo, Xabier P. Igrexas, que achacou esta situación a algunha “clase de fobia ou odio irracional contra as árbores” por parte do rexedor de Vigo, Abel Caballero.

Másnoticias

Vigo ganará un gran "pulmón verde" en Teis y se hará con la zona arbolada del Colegio Apóstol

22/07/2026

Un "templo" del ciclismo en Vigo comienza una nueva vida con una "liquidación histórica" de sus artículos

22/07/2026

“Ten que existir algún motivo oculto para cebarse contra un exemplar singular e catalogado nuns xardíns que están declarados como Ben de Interese Cultural e, polo tanto, gozan de protección integral”, salientou Igrexas, que lembrou que “nunca se debeu ter instalado o alumeado na árbore” porque vulnera de maneira evidente a ordenanza de Medio Ambiente.

O edil nacionalista reiterou así a esixencia realizada nos pasados meses desde o BNG para poñer fin a “este disparate” de manter os adornos na Alameda. Recordou que foi tras unha denuncia do Bloque a finais de marzo cando se procedeu á retirada das estruturas de madeira do mercado de Nadal, non así das luces colgadas da araucaria.