O BNG reclama 144 millóns máis para Vigo nos Orzamentos da Xunta de 2025

O Bloque Nacionalista Galego reclama 144 millóns máis para Vigo ao proxecto de Orzamentos da Xunta de Galiza do vindeiro ano 2025. A fronte nacionalista vén de formular 41 emendas parciais ao proxecto de contas do Goberno de Rueda.

O portavoz municipal do BNG, Xabier P. Igrexas, canda as deputadas e o deputado vigués no Parlamento galego Alexandra Fernández, Carmela González e Brais Ruanova, cargou este xoves en rolda de prensa  contra a "política de castigo do PP coa maior cidade galega" para asegurar que "foi masivamente rexeitada polas viguesas e vigueses nas pasadas eleccións galegas nas que o PP foi derrotado e o BNG convertémonos en primeira forza”.

Másnoticias

Hallan 23 kilos de cocaína en el Izmit Express, el barco interceptado con droga en Vigo

21/11/2024

Tres candidaturas diferentes concurrirán a la Asamblea del BNG

21/11/2024

O Bloque propón nas súas emendas unha batería de medidas para enfrontar a crise industrial, reverter a privatización sanitaria, responder ao grave problema da vivenda, desenvolver infraestruturas pendentes, avanzar na sustentabilidade ambiental e apoiar o tecido cultural e o deporte vigués. Emendas que, subliñan dende a fronte nacionalista, expresan o “absoluto compromiso” do BNG coa cidade.

• Enfrontar a crise industrial. Trasladan medidas por un importe de 23 millóns de euros para blindar sectores estratéxicos como a automoción, o naval ou as tecnoloxías da información fronte ás ameazas que padecen. Con propostas como despregar un Plan Comarcal de Reindustrialización, crear un Centro de Reparacións do Naval e poñer en marcha un Centro Metropolitano de Impulso Tecnolóxico.
• Sanidade. Piden aumentar en 78 millóns o investimento na área sanitaria. Entre as medidas, reclama máis recursos para fortalecer unha Atención Primaria “colapsada”, reforzar os recursos para radioterapia e crear dous novos Puntos de Atención Continuada (PAC) en Navia-Coia e Teis. En relación ao Hospital Álvaro Cunqueiro, reitera a "necesidade" de rescatar a concesión privada, acondicionar o entorno do centro médico e ampliar a unidade de saúde mental infanto-xuvenil. Do mesmo xeito, defende a absorción de Povisa na rede sanitaria pública.
• Vivenda. O Bloque demanda destinar 12 millóns de euros adicionais para dotar á cidade dun parque público de vivenda que garanta solucións habitacionais fronte ao aumento dos prezos.
• Ensino e cultura. Defenden aumentar en máis de 3 millóns de euros os investimentos nesta materia, tanto para a mellora das infraestruturas actuais como para facer realidade “dunha vez” o prometido instituto de Navia. No ámbito cultural, piden ampliar a ESADg, mellorar a rede de museos e crear unha rede de bibliotecas municipais en colaboración co Concello de Vigo.
• Infraestruturas pendentes. Destacan os investimentos para prolongar o túnel de Beiramar e para construír o túnel de Xulián Estévez, a mellora nos accesos ao Ifevi e a reforma da antiga estación de bus da Avenida Madrid para destinala a usos sociocomunitarios. No capítulo de mobilidade, o Bloque demanda recursos para integrar Vigo na rede de transporte da súa área metropolitana, así como conexións de bus directas cos hospitais públicos, a universidade e o aeroporto.
• Residencias e escolas infantís. O BNG defende emendas para construír unha residencia de maiores no barrio de Coia, crear novas escolas infantís na cidade, mellorar o Punto de Encontro Familiar e dotar de máis recursos para o actual Centro de Información ás Mulleres e desenvolver dous novos centros. Tamén no apartado deportivo, esixen recursos para facer realidade a pendente reforma das pistas de atletismo de Balaídos.
• Avanzar na sustentabilidade ambiental. Apostan por máis fondos ao saneamento integral da Ría de Vigo, a mellora das redes de abastecemento de auga, o control de verteduras no río Lagares así como o prometido anel verde, en colaboración coas comunidades de montes.