Ponteareas proxecta a cobertura da Praza da Música no Auditorio cunha grande estrutura lixeira e sombreada

A alcaldesa de Ponteareas, Cristina Fernández, presentou o anteproxecto de cobertura da Praza da Música situada sobre o Auditorio Municipal, que inclúe tamén importantes remodelacións interiores. A rexedora cualificou de “espectacular” a proposta técnica elaborada polo equipo redactor do anteproxecto “que converterá esta praza céntrica nun espazo público moderno e de calidade, utilizábel todo o ano para innumerábeis usos sociais”.

O anteproxecto concibe a actuación como unha remodelación de todo o espazo que circunda o Auditorio. Ademais de dotar á praza dunha cuberta lixeira con sombra vexetal, protexéndoa da choiva, o anteproxecto inclúe a renovación da fachada principal do Auditorio, dotándoa de maior envergadura e presenza; a instalación de nova iluminación exterior e de novo mobiliario urbano e a renovación das entradas laterais á praza e ao Auditorio. Por outro lado, tamén prevé actuacións de remodelación no interior do edificio, instalando un montacargas para o acceso de material técnico até o escenario e a rehabilitación debaixo da praza dos diferentes locais situados na zona na que se sitúa o obelisco, que actualmente non son utilizábeis por falta de iluminación, ventilación e humidades. Coa cuberta, o espazo recuperará o volume e altura que ocupaba a antiga Praza de Abastos antes da súa demolición nos anos 70.

Másnoticias

La orquesta París de Noia desvela todas sus fechas en Galicia en junio, varias en el área de Vigo

03/06/2026

Piden 4 años de cárcel para dos acusados de robar en viviendas del área de Vigo con diferentes tretas

31/05/2026

Cristina Fernández lembrou que “na actualidade estamos rematando as obras de impermeabilización do Auditorio e a futuro cobertura asegurará unha maior protección do edificio”. Os informes técnicos municipais revelaron o pasado ano que as obras de impermeabilización realizadas na praza en 2010, cun gasto de 1,3 millóns de euros, non resolveron o problema ao non axustarse ao proxectado e provocaron máis filtracións que obrigaron a pechar parcialmente o Auditorio por seguridade.

A alcaldesa salientou que “a estratexia deste goberno contempla que Ponteareas conte con dous grandes espazos públicos cubertos, un deles a Praza da Música, con 1.250 m2, e outro baixo as naves de Aceros del Tea, con 1.500 m2, para o que xa temos o proxecto e o financiamento”. Ademais, explicou que a actuación na Praza da Música compleméntase co proxecto xa redactado de reforma integral do Mercado Municipal e do seu espazo exterior até ligalo coa Praza da Perillana e co proxecto de humanización das rúas que rodean o Auditorio, cuxa redacción se licitará neste trimestre.