Un milleiro de persoas saíu ás rúas de Vigo en defensa do naval

Arredor dun milleiro de persoas participaron este martes en Vigo na manifestación convocada pola CIG en defensa do naval e polo futuro da comarca. Unha mobilización que arrincou da Dobrada e rematou diante da delegación da Xunta coa que a central sindical quere amosar o seu rexeitamento a unha nova reconversión encuberta “que acabe por afundir definitivamente o naval” e reclamar unha intervención pública directa que reverta a privatización de Barreras e dote a ría dun estaleiro público ou semipúblico.

“Esta manifestación é un exemplo máis de que non nos resignamos fronte á grave crise laboral, social e produtiva que padece a comarca de Vigo, de que non quedamos de brazos caídos mentres avanza a desertización industrial que ameaza xa non só o noso futuro senón o presente”, explicou o secretario comarcal da CIG-Vigo, Alberto Gonçalves.

Másnoticias

Martín Códax elige Vigo para un "encuentro único" para avanzar en su crecimiento en la provincia

26/11/2025

La hamburguesería de Vigo que enamoró a Galicia se reinventará para crecer

26/11/2025

O responsable sindical lembrou que dende o inicio da pandemia "destruíronse só na cidade de Vigo 1.500 postos de traballo nas diferentes actividades industriais", polo que na actualidade hai 6.100 empregos industriais menos dos que había en 2009. “Fronte á propaganda oficial estamos aínda moi lonxe dunha verdadeira recuperación”, lamentou.

Neste senso, denunciou que esta situación de crise industrial “continúa a agravarse sen que a Xunta de Galicia nin o Goberno de España reaccionen e actúen para poñerlle freo”. “Porque a pesar do que poida parecer, o pobo traballador non come de luces led, nin de fanfarria, nin de propaganda”, ironizou. Gonçalves detívose especialmente na “situación límite” do sector naval, “que corre o risco de desaparecer tal e como coñecíamos”. Censurou que os atrancos da Autoridade Portuaria continúen a boicotear a recuperación da actividade no antigo Vulcano, “e Barreras avanza sen freos cara un escenario de liquidación, ao tempo que se mantén a falta de carga de traballo noutros estaleiros como Metalships, e vemos como a industria auxiliar continúa estrangulada por causa da situación que viven os principais estaleiros”.

Para a CIG “non abonda con afirmar nos discursos e nas declaracións a importancia do naval e da industria, hai que demostralo con feitos; menos palabrería e máis DOG e máis BOE; menos xestos e máis decisións concretas”, demandou. O máximo responsable da CIG-Vigo apelou a unha intervención pública que reverta a privatización de Barreras imposta polo Goberno de Aznar a finais dos anos 90 e que dote a ría de Vigo dun estaleiro público ou semipúblico “co que blindar a continuidade da actividade e do emprego nun sector que ademais de estratéxico para Vigo, a súa comarca e o conxunto de Galiza, é para nós rotundamente irrenunciábel”.