"Mulleres Extramuros" xunta este ano nas Neves arte de vangarda, mundo rural e igualdade

Arte de vangarda, mundo rural, igualdade, sostibilidade e intervención do espazo público son as claves do proxecto da Deputación “Mulleres Extramuros” cuxa segunda edición vén de arrancar nas Neves, que toma o relevo á parroquia de Cortegada en Silleda, lugar protagonista o pasado ano.

A Casa da Auga de Vide foi o punto de encontro entre as sete artistas galegas, de España e Portugal, Xoana Almar, Nuvi&Éxfico, Ana Soler, Doa Oa, Carme Nogueira, Lucía Loren e Iva Viana e as mulleres do núcleo rural onde intercambiaron experiencias das que sairán novas propostas creativas que transformarán o espazo e encherán de arte e vida esta contorna.

Másnoticias

¿En peligro la gran reforma de Rosalía de Castro? El conflicto político pone en riesgo esta obra de Vigo

02/06/2026

La Diputación exige una "firma pública" a Caballero para cofinanciar la reforma de Rosalía de Castro

01/06/2026

De novo coordinado por Xoana Almar, de Cestola na Cachola, “Mulleres Extramuros” conta este ano coa participación de sete creadoras e ten como novidade que amais do arte mural, tamén transformará Vide con escultura e traballo cerámico. Xunto a Almar, do Grove, estiveron e participarán Doa Oa (Sober), Nuvi & Éxfico (Nuria Villa e Alberto Brandon, do Rosal e A Guarda), Ana Soler (residente en Vigo), o dúo formado por Carme Nogueira e Javier Fernández Pérez de Lis; Lucía Loren (Madrid) e Iva Viana (Viana do Castelo).

Na apertura desta nova edición, amenizada coas intervencións da Asociación Cultural Vidense e do grupo Saia de lá, a presidenta da Deputación, Carmela Silva, e o alcalde da localidad Xosé Manuel Rodríguez, subliñaron que “Mulleres Extramuros” vai deixar unha pegada na vila coa posta en valor da súas historias e a súa identidade a través da arte. “Este é un proxecto único polo que supón de participación e ensinanza mutua entre as mulleres e por como distintas xeracións poden unirse para deixar un legado común a través da cultura. Estamos levando a arte e a cultura a todo o territorio”, destacou Silva.

Esta fin de semana é a primeira toma de contacto coas mulleres do lugar para escavar na memoria, escoitar as súas historias e situalas no centro, “en definitiva, para implicalas e transformar en arte esta posta en común, recuperando espazo público desde a sororidade e o activismo pola igualdade”, como destacou a presidenta da Deputación. “É algo extraordinario baseado no orgullo do noso rural, cheo de historias, de coñecemento e do traballo atesourado polas mulleres, coas que agora as artistas crearán redes”, engadiu.

O alcalde das Neves, Xosé Manuel Rodríguez, destacou que “Mulleres Extramuros” “ofrece unha excelente oportunidade para que as persoas que vivimos no rural poidamos gozar da arte, aínda máis, diría que merecémonos ter acceso a ela e neste caso, as nosas veciñas e veciños formarán parte do proceso, tanto dende o eido creativo como emocional”. O rexedor destacou estar “especialmente satisfeito e orgulloso porque permitirá amosar a identidade das Neves e dos seus habitantes e abrirá de par en par a porta para que todos e todas valoremos o que temos e o que somos”.

Pola súa banda, a coordinadora do proxecto, Xoana Almar, subliñou “o enriquecedor” do proxecto, que nesta segunda edición “non só ten a pintura como parte central, senón que estaremos convivindo tres muralistas, Cestola na Cachola, Doa Oa e Nuria Villa, tres escultoras , Ana Soler, Carme Nogueira e Lucía Loren e unha ceramista, Iva Viana e creo que vai ser moi interesante”. Tamén quixo poñer en valor a filosofía de “Mulleres Extramuros” de “intervir no rural galego de xeito participativo coa veciñanza” e, neste senso, destacou o proceso de preparación do traballo “feito primeiro coa presentación das artistas e a reunión coa veciñanza, co coñecemento dos espazos e coa convivencia”.

Deste xeito, tras esta primeira fase que vén de celebrarse en Vide terá lugar unha segunda etapa, entre abril e maio, na que as artistas traballarán nos seus proxectos para o núcleo, deseñando un proxecto específico de intervención. A continuación, na primeira quincena de xullo, terá lugar o proceso de creación-residencia, co traslado das artistas á aldea para realizar o proxecto artístico in situ para Vide e inspirado nela. Ese mesmo mes de xullo amosarase xa o resultado dos sete proxectos e o seu impacto nas rúas da parroquia.