A viaxe polas Rías Baixas de Tanxugueiras, de Costa da Vela á Lagoa de Pedras Miúdas

Un himno do amor libre. Tanxugueiras creou en “Pano Corado”, o seu último tema, algo máis que unha canción. Si, volveuno a facer. O seu novo éxito transcende o musical. Ese impacto percíbese no seu videoclip, cuxa publicación en Youtube roza as 300.000 visualizacións. Ademais desa celebración á liberdade de amar e á diversidade sexual e de xénero, o trío de cantareiras composto por Aida Tarrío e as irmás Sabela e Olaia Maneiro ambientou boa parte de “Pano Corado” en lugares icónicos de Galicia, espazos impresionantes que mostran á súa importante lexión de fans algúns dos tesouros que esconden as Rías Baixas.

Un deses lugares que acompañan a Tanxugueiras durante os 230 segundos que dura o vídeoclip de “Pano Corado” é Costa da Vela. Cangas posúe este enclave único, un paraíso virxe onde un pode camiñar polo seu roteiro dos faros, contemplar a maxestosidade das Cíes coa sensación case de tocalas cos dedos ou gozar dunha impresionante posta de sol na Caracola de Donón, un dos lugares que máis fotos acumulan en Instagram das Rías Baixas.

Másnoticias

Moaña ofrece estes 45 eventos para que goces do mellor verán da túa vida

05/07/2022

Denuncian falta de cobertura de enfermeras en Cangas y el Sergas afirma que el plan de vacantes se cumple

04/07/2022

Ir a Costa da Vela non só é empaparse da natureza máis virxe que ofrece a comarca do Morrazo. Tamén é unha viaxe ao pasado, ás nosas orixes. O roteiro pódese completar subindo ata o Castro do Monte Facho, onde aínda poden apreciarse restos de vivendas, das murallas e mesmo dos altares nos que se realizaban ofrendas aos deuses.

A viaxe de Aida Tarrío e as irmás Maneiro no seu himno ao amor libre e á diversidade tamén fai parada nun lugar excepcional como é o Lago Castiñeiras, un espazo natural que emerxeu na década dos 50 a través do seu lago artificial. Con todo, agora é un emprazamento onde un pode atoparse cunha gran variedade de especies arbóreas. Os visitantes tamén poderán contemplar unha importante colonia de aves e terán á súa disposición dous observatorios.

O terceiro destino que nos permite contemplar Tanxugueiras no seu novo videoclip é a Lagoa de Pedras Miúdas, unha xoia natural xurdida do que noutro tempo foi unha canteira. O espazo, ideal para aqueles que queiran descubrir lugares únicos e singulares, é a clara mostra sobre como a natureza se transforma co paso do tempo, sobre todo nun lugar onde antigamente estivo unha canteira.

As outras localizacións que podemos contemplar en “Pano Corado” son o colexio San Narciso e o Lavadoiro de Mogor -ambas en Marín-, Santa Cruz en Moraña, a recentemente inaugurada Sala Molotov en Vigo e a Cidade da Cultura en Santiago de Compostela.