As viguesas Vértebras chegan con 'Moito Love' para remover o panorama do rap galego feminino

"Escupindo verbas que saen da raiba" preséntanse Vértebras na efervescente escena musical galega. Actitude, compromiso e axitación son algúns dos sinais de identidade sobre os que o dúo de Vigo artella a súa proposta dende o ámbito conceptual. Dende o musical, o rap, entendido con descaro e amplitude dende diversas das súas vertentes, é a pedra angular da súa identidade.

Vértebras son Ika Subversiva e Amari. Chegan dende Vigo coa vontade de remover o panorama do rap galego feminino. Vértebras son meigas, porque habelas hailas, que bailan, berran "e o cora axitan". Que bulen porque o tempo vai moi a présa. Elas mesmas preséntanse así en 'Moito Love', un tema escrito e cantado integramente en galego, adianto do que será o seu inminente álbum de debut.

Másnoticias

Nace una nueva gran fiesta gastronómica en Vigo, precios y fecha de la Festa dos Callos de Cabral

03/11/2025

Arranca en Vigo el festival de humor y literatura infantil con una sesión de cine y música

03/11/2025

'Moito love' aférrase nas súas poderosas e contundentes bases aos postulados do rap old school, contemporaneizado cunhas harmonías vocais que enchen o espazo sonoro. Dende ese rexistro Vértebras erguen un discurso crítico cunha profunda carga social. Sen egos desmesurados pero tampouco sen pasar pretender desapercibidas. Vértebras non xogan a iso. O seu é un retrato fiel e ferinte das súas inquedanzas, das súas raibas, dos temores propios e dos medos xeracionais. «Hip hop feminista, voz para todas as esquecidas», proclaman.

Porque entre a escura profundidade dos beats e o amargor do que lles rodea, tamén atopan Vértebras unha luz para reivindicar os coidados, a comunidade, a familia e o amor. Á prolífica, poliédrica e sempre inqueda escena do rap e do hip hop galego séntalle de marabilla a chegada dunha voz como a de Vértebras. Coas raíces ben ancoradas na esencia do xénero pero cun discurso musical, conceptual e estético desprovisto dos tópicos que tantas veces o uniformizan.

E isto é tan só un primeiro paso. Como elas mesmas recoñecen aínda "estamos aprendendo e enfrontándonos ás nosas realidades (...), explotando capacities". E aquí, ben se ve, hai moito que explotar. A mellor proba é este 'Moito Love', unha máis que brillante e estimulante declaración de intencións e unha gran mostra do que nos pode agardar nas vindeiras entregas deste proxecto.

Dende Vigo 

Vértebras naceu en febreiro de 2023 como lugar de confluencia de dúas mulleres con distintas raíces pero coa mesma paixón pola música.  Os seus pasos previos sitúanas da man do colectivo Alunizadas ata que chegou o seu primeiro concerto como Vértebras na sala Babylon en León.  En marzo de 2023 gañaron o XV Concurso de Maquetas do Festival Millo Verde, o que as levoua a actuar ese verán no escenario do festival de Cesantes, así como noutros eventos como o Atrapa O Beat.

Vértebras componse de Ika Subversiva, violonchelista e pedagoga. De orixe segoviano e corazón galego. Involucrada na acción social coma militante en diferentes colectivos e coma docente. Tamén é integrante do grupo Fixe Trío. Pola outra banad está Amari, galega ao cento por cento. Apaixonada polo boom bap e polo máis puro estilo old school, achega un discurso directo da rúa. É escritora dende nena e principiante no freestyle.