Cada dous meses, un libro: así é o proxecto Reseñas da Universidade de Vigo

Máis aló das aulas, sexan presenciais ou virtuais, a Universidade ofrece outras múltiples alternativas formativas tanto para ampliar coñecementos como para mellorar as capacidades docentes e investigadoras. O proxecto reseñas naceu precisamente para dar a coñecer algúns destes recursos entre a comunidade universitaria e estimular o bo uso e o manexo das fontes de información e servizos que ofrece a Biblioteca Universitaria.

A idea naceu en 2018 impulsada polo persoal da Biblioteca de Torrecedeira como un espazo de lectura, pensamento e reflexión aberto a toda a comunidade universitaria, no que cada mes se propoñía un libro de lectura e, arredor disto, toda unha serie de actividades. Nesta terceira edición o formato cambia, obrigado pola situación de crise sanitaria, pero continúa coa súa programación. Así, como explica Aser Ángel Fernández, técnico especialista da Biblioteca Torrecedeira, cada dous meses presentarase “a crítica ou descrición dun libro de interese para a comunidade universitaria e a cidadanía”. A idea é que destas propostas “poidan xurdir novas lecturas e documentos complementarios que fomenten a reflexión e a formación continua daquelas persoas que nos acompañen”. Porén, non está previsto organizar instalacións e seleccións expositivas de libros de xeito físico nas salas da biblioteca, como era habitual nas edicións anteriores. As reseñas poden consultarse nas redes sociais da Biblioteca de Torrecedeira ou no seu blog.

Másnoticias

El imperio contraataca en la Estrella de la Muerte de la Navidad de Vigo

23/11/2024

Vigo anuncia medidas por el temporal Bert y suspende las visitas al árbol de Navidad

23/11/2024

Temáticas

Nesta edición de reseñas abordaranse, cada dous meses, temas como a historia e a economía mundial, os adiantos científicos, a epixenética, os clásicos da literatura, a filosofía ou a pedagoxía. “Temos a ledicia de poder contar coas achegas desinteresadas de persoas como o profesor de grego Óscar Soto, a bibliotecaria de Filoloxía e Tradución Ana María Bande, o alumno do Programa Universitario de Maiores Carlos Lloréns e mesmo do profesorado da Universidade de Vigo”, explica Aser Ángel Farnández. Neste espazo de encontro, engade, “ofrecemos a posibilidade de gozar coas observacións das preparacións histolóxicas ao microscopio Pareidoilas, da profesora Rosa Álvarez Otero, do Departamento de Bioloxía Funcional e Ciencias da Saúde, as análises da profesora Araceli González Crespán, do Departamento de Filoloxía Inglesa, Francesa e Alemá, ou as apreciacións do profesor Andrés Sanjuan, do Departamento de Bioquímica, Xenética e Inmunoloxía, investigador do Grupo IN1 Inmunoloxía do Cinbio.

Seis reseñas para un curso

A primeira cita deste curso é con Loxandra, de María Iordanidou, escritora nada en Constantinopla a finais do século XIX. Nesa mesma cidade transcorre a historia que relata o libro, a historia da súa familia que xira arredor da súa avoa, Loxandra. O autor desta primeira reseña é o profesor de Grego Óscar Soto, que explica que a obra recolle “unha vida de novela dunha protagonista fenomenal”. Iordanidou retrata “unha saga familiar na que moitos, os que tivemos a sorte de vivir unha infancia nunha familia extensa, podemos vernos reflectidos, polo menos en parte: avós, tíos, curmáns, pais, irmáns, parentes achegados ou distantes, xente que vai e vén, mais que toda xira ao redor coma planetas dun astro central, a figura case omnipotente da avoa e xermolo desa extensa saga, na que é fácil perderse, porque son moitos os personaxes e con nomes de sonoridade moi distinta á que estamos afeitos”. Sen embargo, para Soto “xa non hai Loxandras nin existe o seu mundo”, un mundo que é unha “metáfora da continuidade, porque a sensación que transmite a lectura é a dun mundo inmutable e idéntico dende hai séculos”.

A seguinte cita, con reseña17 será para decembro e xaneiro e ten como protagonista La edad de la ira, de Pankaj Mishra, da man da bibliotecaria da Biblioteca de Filoloxía e Tradución, Ana María Bande. Entrando en 2021, a reseña18 de febreiro e marzo centrarase en El ojo del Observador. Johannes Vermeer, Antoni van Leeuwenhoek y la reinvención de la mirada, un volume asinado por Laura J. Snyder. O encargado de facer a reseña é Aser Ángel Fernández, bibliotecario da Biblioteca de Torrecedeira. A esta cita súmase a exposición Pareidoilas, da profesora Rosa Álvarez. En abril e maio o volume escollido é La epigenética. Cómo el entorno modifica nuestros genes, da man de Andrés Sanjuan, profesor do Departamento de Bioquímica, Xenética e Inmunoloxía e investigador do grupo IN1 Inmunoloxía do Cinbio. Xa en xuño e xullo chegará o reseñas20 con Los cuentos de los hermanos Grimm tal como nunca te fueron contados, introducidos por Araceli González Crespán, profesora do Departamento de Filoloxía Inglesa, Francesa e Alemá. A programación remata co reseñas21 en agosto e setembro con Las arquitecturas del deseo. Una investigación sobre los placeres del espíritu, de Jose Antonio Marina, da man de Carlos Lloréns, estudante do Programa de Maiores.