Culturgal, a "casa común" da cultura galega, abre as súas portas en Pontevedra

A décimo sexta edición de Culturgal abriu as súas portas este venres no Recinto Feiral de Pontevedra para seguir sendo a "casa común" da cultura galega. A Feira das Culturas Galegas despregará até o vindeiro domingo 3 de decembro un programa "variado e transversal" que servirá como escaparate das culturas "ricas e variadas" que existen en toda Galicia, segundo destacou no acto de inauguración o presidente da asociación Culturgal, Víctor López.

"Culturgal é un escaparate, pero tamén unha xanela ao futuro" que ofrece este ano unha programación "ampla e plural", que, remarcou, aspira a "retratar a variedade de propostas que temos a día de hoxe".

Másnoticias

El Culturgal sale por primera vez de Pontevedra y se expande a Vigo con dos días de actividades

21/11/2023

Culturgal pecha a súa 15ª edición cun agradecemento ás empresas expositoras e patrocinadores

27/11/2022

Máis de 200 actividades desenvolveranse en Culturgal 2023, nos seu cinco escenarios dedicados á literatura, a música, as artes escénicas, a programación infantil ou a arte, ademais de áreas dedicadas aos videoxogos ou aos cómics.

Nela participan máis dun centenar de expositores, que non só exhiben o máis selecto da produción cultural galega que cada un dos sectores impulsou este ano, senón que mostran un avance das novas tendencias e propostas nas que traballan para 2024. A feira ten este ano unha ampla programación para toda a familia.

"Solidez e competitividade"

No seu discurso durante o acto de inauguración, o conselleiro de Cultura, Educación, FP e Universidades, destacou "a solidez e a competitividade" da industria cultural galega, á que puxo como exemplo de "modernización e capacidade de adaptación aos novos formatos e hábitos de consumo". O responsable de Cultura no Goberno galego explicou que a Xunta destinará a este sector 105 millóns de euros en 2024 e que necesita tamén do compromiso do Executivo central para "garantir un desenvolvemento innovador e competitivo".

Así llo trasladou nunha carta ao novo ministro na que reitera a importancia da elaboración dun PERTE para a cultura que recoñeza o seu valor e de que se trasladen a Galicia os fondos necesarios para garantir o galego nas novas tecnoloxías.

Segundo os datos ofrecidos polo conselleiro, a cultura supón xa o 3% do PIB en Galicia e emprega a unhas 35.000 persoas, ademais "cohesiona e identifícanos como pobo e ten a virtude de que non se usa nunca para comparar e para separar", senón que "respecta a diversidade e a diferenza", manifestou.

"Municipalismo cultural"

Pola súa banda, o presidente da Deputación de Pontevedra, Luís López, destacou o "esforzo" do goberno provincial ao subir un 20% a partida orzamentaria de Cultura que chegará no 2024 a preto de 5 millóns de euros. Tamén remarcou o "municipalismo cultural" que practica o goberno provincial a través da programación de eventos itinerantes por toda a provincia relacionados con disciplinas como o teatro, a danza, o cinema ou a música.

O alcalde de Pontevedra, Miguel Anxo Fernández Lores, pechou a inauguración de Culturgal celebrando o bo momento da cultura galega, "sobre todo na súa calidade", algo que demostra a súa "capacidade de resistencia e levantando cabeza após períodos escuros e sombríos".