O 25 aniversario de Heredeiros da Crus chega hoxe ás librarías

Editorial Xerais tamén volta ao cole. Este retorno na súa rutina leva consigo as habituais novidades de cada mes. Nesta ocasión, hai unha sorpresa. Un golpe á nostalxia dos amantes do rock en galego. O xornalista Antonio Díaz Ageitos publica “Heredeiros da Crus: Cuadrilla de Pepa a Loba”. O libro é un percorrido polos 25 anos dunha banda que marcou a historia da música galega a varias xeracións, incluso as máis novas que poderon descubrir o grupo a través das cancións do Xabarín Club.

A publicación sobre estes 25 anos de Hereidos da Crus chega este xoves ás librarías. A presentación da publicación será o vindeiro sábado 22 de setembro en Sonar, en Santiago de Compostela, ás 22:00 horas. Dende a propia banda propoñen aos fans da banda galega tres pasos moi sinxelos. “Merca o libro, ‘resibe’ a túa entrada e recolle o libro na festa e lévao asinado para casa”.

O libro leva ao lector a Ordes, A Coruña, no mes de marzo de 2012. Na vila hai un especial rebumbio. É un lugar tradicional de marcha nocturna, pero ese día non é unha xornada calquera e o extraordinario movemento de persoas dá conta diso. Todas veñen cantando as mesas cancións e no ambiente nótanse excitación e nervios. É unha peculiar peregrinaxe á que están convocadas dende hai meses. Nas redes sociais estendeuse unha mensaxe críptica a ollos profanos, pero evidente para os iniciados: “Volven os máis jrandes”. Un J que despexaba calquera dúbida. Oito anos antes, Heredeiros da Crus anunciaran a súa separación. Atrás, trece anos de historia, oito discos e centos de concertos de tolemia, escándalos, diversión e moito rock’n’roll. Unha lexión de seguidores de toda Galicia quedaba orfa. O tempo pasou e, nas redes sociais, paseniñamente, medrou unha idea lanzada ao aire á que cada vez se uniu máis xente. “Queremos que volvan os Heredeiros da Crus”. Esta obra editada por Xerais é a crónica de como o soño entolecido dun mariñeiro unha noite de marea rematou converténdose nun capítulo fundamental da historia do rock feito en Galicia. Unha viaxe que empeza a bordo dun pequeno pesqueiro, pasa por un galiñeiro e remata compartida en escenarios por milleiros de persoas.

Antonio Díaz Ageitos (Ribeira, 1975) é o autor deste libro sobre os 25 anos de Heredeiros da Crus. É licenciado en Xornalismo pola Universidade de Santiago. Traballa nos Servizos Informativos da Televisión de Galicia, onde entrou de bolseiro en 1996. Dirixe dende o ano 2001 o programa “A Revista Fin de Semana”, con pausa entre 2002 e 2004 para ser correspondente en Nova York. Agora saca o seu primeiro libro, unha publicación que ten como protagonista a unha das bandas de rock máis importantes da historia de Galicia.