Que motivos lle daría ás veciñas e veciños de Nigrán para que elixan a súa candidatura este domingo?
Temos un proxecto de futuro e serio para Nigrán. Temos medidas concretas para avanzar en temas estratéxicos como pode ser o Urbanismo co PXOM.
No caso de ser alcalde ou estar no goberno, como se imaxina o Nigrán de dentro de catro anos?
Máis participativo e transparente. Máis democrático. Cun PXOM aprobado e que favoreza á maioría da poboación, non a uns poucos. Un Nigrán con certos cambios estruturais en turismo, desemprego e transporte público. Imaxino Nigrán cunha liña de transporte público que una as parroquias do interior.
Cales son os retos a nivel cultural que ten Nigrán?
O maior avance que houbo nestes catro anos foi a construción da nova biblioteca na cal fomos determinantes. Tanto este goberno como o anterior ou ben querían facer un traslado ou unha ampliación da que había. O proxecto actual pensa a longo prazo para pensar na biblioteca como un lugar de intercambio cultural. Por outra parte, a programación cultural está moi enfocada á festa no verán. Queremos dar máis peso a actividades como teatro ou cinema durante todo o ano.
Con que expectativas encarades as eleccións municipais?
Nos presentamos para gañar as eleccións, claro. Pero gustaríanos polo menos aumentar a nosa presenza. Estes catro anos o noso traballo foi moi rigoroso con propostas en positivo. Fixemos oposición construtiva e iso a xente o viu. Esperamos seguir sendo determinantes.
Que sería para vós un bo resultado?
Lograr catro concelleiros.
E un malo?
Repetir dous concelleiros, porque significaría que non fomos quen de transmitir o noso traballo á veciñanza.
Con quen pactaríades para formar goberno?
O lóxico é cos que estamos máis próximos ideoloxicamente, pero debe ser segundo un programa. No anterior mandato fixemos 37 propostas para facilitar a investidura ao alcalde. Dixo que estaba de acordo co 90% e despois non se cumpriu practicamente ningunha. Un pacto debería ser claro e público con controis sobre a súa execución.
Por que un votante de esquerdas debe votarvos?
Se ben dentro do campo da esquerda hai varias opcións, co PSOE como maioritaria, é necesario alguén que lle lembre o que é unha política de esquerdas. Este convenio non aplicou o convenio colectivo a certos traballadores temporais.
Que medida tomaríades nos primeiros 100 días de goberno?
Facer público o estado actual de tramitación do PXOM. Non o vemos claro. Parece ser que o equipo redactor entregou a documentación pero non se manda a todos os organismos que teñen que ser informados. A segunda medida sería implantar, algo que está aprobado a iniciativa nosa, canles de participación da sociedade civil de Nigrán. E en terceiro lugar, establecer un control real sobre as empresas privatizadas que son concesionarias de servizos públicos. Hai auditorías que din que a do lixo nun ano non fixo servizos por 100.000 euros e non se lle reclama. Hai que establecer un control.
Que papel debe xogar Nigrán na comarca do Val Miñor?
Somos o concello máis grande do Val Miñor. Formamos parte da Mancomunidade e cremos que hai que reestruturala. Non pode seguir como funciona. Agora é soamente un órgano administrativo que xestiona dous ou tres servizos. O presidente de turno, que é un alcalde, o que fai e esperar a que pase o mandato para pasarlle os problemas ao seguinte alcalde. Pero ten que ser algo entre os tres concellos.
Estás dacordo na constitución da Área Metropolitana de Vigo?
É fundamental. Ten que desbloquearse. Hai servizos, como a auga, que consumimos todos do mesmo encoro, polo que a xestión debe ser conxunta. É fundamental especialmente para o tema do transporte. Igual que nós queremos crear unha liña municipal entre as parroquias é necesario solucionar os problemas do transporte con outros concellos, co Hospital e coa Universidade.
Que se fixo mal neste 4 anos?
Houbo certo pasotismo con respecto a propostas positivas que fixemos como no control dos vertidos aos ríos e mares ou no aforro de enerxía no alumeado público. O que se fixo peor foi permitir que a xente se bañara en Praia América sabendo que estaba contaminada. Pero máis que mal o peor foi non facer. Non se fixeron avances substanciais no PXOM.
Cal é o modelo turístico que se debe aplicar en Nigrán?
Hai que fomentar un turismo de calidade e respectuoso co medio ambiente. Hai que desestacionalizalo, que é moi sinxelo dicilo. Propoñemos un Plan Estratéxico de Turismo para implantar unha serie de medidas que fomente o turismo todo o ano. Por exemplo, poñer un panel publicitario en Caminha onde se divide o Camiño de Santiago para indicar a variante da costa.
Que opinión ten sobre a renuncia das bandeiras azuis?
Pedín ao Concello todos os escritos recibidos e enviados a Fundación Europea de Educación Ambiental para coñecer esas supostas presións que fan sobre Nigrán. Non se nos facilitou. Estamos un pouco a cegas, sobre todo cando o alcalde se referiu a unha certa discrecionalidade. Agora ben, o fundamental é que as praias sexan seguras e estean limpas. O problema e que este goberno ocultou xa unha vez unha contaminación aos bañistas durante seis horas. Non nos parece de fiar que vaia manter os controis. Ou seguen as bandeiras azuis ou se aplica algún tipo de control externo.
No verán hai en Nigrán eventos como o Vive Nigrán, o Solpor, o Nigranjazz ou o Season Fest, que fariades con estas citas?
Algúns son prioritarios, outros non. Vive Nigrán é unha marca privada. Manteríamos un ocio de verán pero sen unha excesiva proliferación. Están proliferando festivais e festas que están a xerar problemas de convivencia polo ruído. Continuaríamos con esa política pero mantendo un equilibrio coa convivencia dos veciños.
Xa sei que non é competencia municipal, pero ¿tedes algún plan forestal para evitar que ocorra unha traxedia como a de Chandebrito?
Hai que cumprir a lei. Estableceríamos ademais unha colaboración coas Comunidades de Montes para tratar de cambiar o modelo forestal. Substituír especies altamente combustibles por outras que non o sexan.
Que proxecto lle ilusionaría a Jose Cuevas facer por Nigrán?
Igual que cando comezamos o mandato fixemos un estudo entre 50 concellos de Galicia sobre a biblioteca que tiña que ter Nigrán. Agora toca o saneamento e un centro de día no antigo centro de saúde de Panxón.