O “Got Talent” de Moaña terá participantes de 5 a 80 anos

Este sábado, 30 de marzo, o Auditorio do Centro Socio-Cultural Daniel Castelao de Quintela acollerá a primeira edición do Peixe Fest, un festival de talentos impulsado por un grupo de seis nenas de entre 9 e 10 anos.

A cita, que arrancará ás 18:30 horas, contará con doce actuacións que sumarán entre 70 e 80 persoas sobre o escenario. “Teremos actuacións de moitas clases, dende a danza ao teatro pasando pola música”, explica unha das organizadoras que adoptaron o alcume das Seis Mosqueteiras.

Entre as actuacións, a máis multitudinaria a representará a Coral Moañesa con até 50 membros de 8 a 80 anos. Tamén haberá outras propostas como un baile de hip hop que levará a cabo “The Magical Warriors” ou un mini concerto de violín.

En total, o festival contará con doce actuacións que non poderán sobrepasar os tres minutos de duración. Este novo evento de talentos estivo aberto a tódalas idades e dispón de varias categorías: Xoubiña, para a rapazada que curse dende 4º de educación infantil ata 1º de primaria incluída; Xouba, para as nenas e nenos que cursen dende 2º ata 5º de primaria; Sardiña, rapazada que curse dende 6º de primaria ata 4º de ESO; Pan de millo, destinado dende Bacharelato ata persoas xa adultas; e Empanada milla, una modalidade na que un grupo composto a lo menor por 2 persoas, das que a lo menos unha sexa das categorías de “peixes” e outra da categoría “pan de millo”.

A organización corre a cargo dun grupo de nenas ben proactivo: Sabela, Carmen, Carla, Emma, Vania e Sara, que comezaron a discorrer o festival xa en agosto do 2018. Tras o visto e prace do Concello de Moaña, as últimas semanas as organizadoras recoñecen que as viviron “un pouco nerviosas” e adiantan unha “gran sorpresa final”.

A iniciativa conta co “apadriñamento” da Alcaldía. A rexedora, Leticia Santos, amósase “segura que vai ser todo un éxito” e manifestou a súa vontade de celebrar unha segunda edición porque “traballar con estas mozas da gusto”. Á pregunta de se estarán dispostas a organizar unha nova edición, as Seis Mosqueteiras responden de forma unánime: “siiiiiii”.