Sete rutas gratuítas para coñecer os tesouros de Moaña

A beleza de Moaña vai máis aló do verán. A vila morracense convive co encanto. Porén, continúa tras os meses de xullo e agosto co ciclo de visitas guiadas de “Descubre Moaña”, unha serie composta por cinco percorridos repartidos en sete datas diferentes co obxectivo de que tanto a veciñanza como os visitantes poidan coñecer os seus encantos naturais, paisaxísticos e históricos.

A nova entrega de “Descubre Moaña” comeza este sábado 7 de setembro. Estas rutas guiadas pola asociación A Illa dos Ratos consolídanse nun ano con datos excepcionais, que amosan o éxito desta proposta que iniciou o Concello de Moaña fai case un ano. Preto de 750 persoas participaron nos 23 itinerarios organizados a día de hoxe, cunha media de 32 persoas de media en cada unha delas.

Másnoticias

Detenidos los presuntos autores de un robo en el interior de una vivienda de Cangas

23/05/2023

Fallece en la Ría de Vigo el reconocido fotógrafo submarino José Luis González

20/05/2023

A temporada de outono de “Descubre Moaña”, que terá lugar os meses de setembro, outubro e novembro, arrinca este 7 de setembro coa ruta “Canteiras do litoral de Moaña”. Ao longo do percorrido os asistentes descubrirán a historia que agochan as antigas canteiras do litoral de Moaña e que foron a orixe do crecemento económico e social da vila. Co paso do tempo e o desmantelamento das canteiras, eses novos espazos serviron de ubicación para novas actividades empresariais relacionadas co mar, como no caso do estaleiro ASCON ou de Conservas A Guía.

• Cando? 7 de setembro e 5 de outubro
• Onde? Canteira do Cocho (Ao carón do Colexio da Guía).

Sen abandonar a franxa litoral os roteiros levarannos á “Moaña mariñeira”, que percorre a historia do municipio e as súas xentes. Ao longo deste percorrido polo litoral entre o Porto de Moaña e o Porto de Meira os asistentes coñecerán detalles dos inicios da pesca tradicional, a historia do Pósito de Moaña e a figura do seu impulsor D. Jose Costa Alonso ou algúns dos naufraxios máis importantes que afectaron as familias de Moaña.

• Cando? 22 de setembro e 19 de outubro
• Onde? Porto de Moaña e remata no Porto de Meira

A terceira ruta será por “O sendeiro da Fraga”, que nos seus catro quilómetros, que comezan na desembocadura do río na praia da Xunqueira, permitirá coñecer a importancia dos ríos, o seu ecosistema e o importante uso dos muíños. .

• Cando? 29 de setembro
• Onde? Praia da Xunqueira

A seguinte ruta afondará no aspecto histórico. “Descubre Moaña” chegará ao barrio de San Martiño. Desta vez a visita apenas nos obrigará a camiñar, xa que soamente percorreremos a contorna da igrexa. Os asistentes descubrirán a historia das casas e como apareceron aí e outros elementos propios dun dos barrios senlleiros do municipio.

• Cando? 3 de novembro
• Onde? Igrexa de San Martiño

Por último, co obxectivo de visibilizar ás “mulleres da historia de Moaña” en colaboración co Centro de Información á Muller, a zona do Porto acollerá un roteiro o domingo 24 de novembro. Desta vez porase en valor o papel da muller dentro do desenvolvemento da sociedade e a vila de Moaña. Historias que paga a pena coñecer sobre figuras importantes con nome propio como Lela Soage, Elisa de la Peña, Lola Diz ou Concepción Arenal, fortemente vencellada ao municipio, que se mesturarán con alusións a colectivos máis anónimos como as peixeiras, as mariscadoras ou as carreiras.

• Cando? 24 de novembro
• Onde? Zona do Porto.

Como participar nas visitas guiadas de Moaña?

Aínda que estas visitas guiadas son de balde, é preciso anotarse previamente ante o número limitado de prazas. Todas as persoas interesadas deberán inscribirse previamente no 611 08 08 53 ou a través do correo electrónico de ailladosratos@gmail.com. 

A Asociación Cultural A Illa dos Ratos, encargada das visitas, conta cunha ampla experiencia na organización destas visitas turísticas en Cangas, municipio onde comezou a súa actividade en xaneiro de 2016. Na actualidade, o colectivo está formado por 14 persoas, entre as que se atopan especialistas en turismo ou educación ambiental.