Moaña é un concello de mar, de verán e de praia, pero tamén é un municipio cunha enorme riqueza natural. Unha das opcións máis escollidas en Moaña son precisamente as rutas de sendeirismo, que o municipio ofrece dende a beira do mar até o alto da montaña. Propoñémoste adentrarte nos bosques que aínda conservan os carballos, castiñeiros, bidueiros... e tamén os icónicos muíños cos que os nosos devanceiros aproveitaban os recursos naturais. A continuación podes consultar tres rutas naturais a través de sendeiros seguindo os cursos fluviais que permiten desconectar tecnolóxicamente e reconectar coa natureza.
A ruta do río Fraga atrae cada fin de semana excursionistas que buscan o contacto coa natureza máis virxen e fascinante. Os que se achegan poden desfrutar dun sendeiro a través dos máis de 12 quilómetros de tranquilidade e o son do río, no que se espallan pequenas pozas e fervenzas de auga limpa e pura. A ruta da Fraga ofrece varias opcións: pódese comezar dende abaixo na praia da Xunqueira, na zona alta de Meira, facerse como percorrido lineal, ampliar a ruta circular na parte superior dende o torreiro do Millo, facerse no verán ou no outono…
O sendeiro é dunha beleza extraordinaria, de natureza e muíños restaurados polo Concello de Moaña. Podes optar por facela enteira (nesta ligazón tes opcións de Wikiloc) ou ben optar polo tramo alto (cuxo inicio podes atopar aquí).
Outra opción é optar pola ruta dos ríos da Freixa e da Miñouba. Nesta caso, ademais, podes facer unha parada de descanso na mítica Poza da Moura, unha fervenza que remata nunha pequena piscina natural rodeada de máxicas lendas. Partindo dende o porto de Domaio o camiño vai ascendendo seguindo os ríos ata chegar á poza e retornar de novo ao porto. Nesta ligazón tes unha posible ruta para realizar esta senda.
Unha das mellores opcións para visitar Moaña con crianzas é A Poza da Moura, na parroquia de Domaio. Espazo natural no alto do río da Miñouba, conxuga tradición e simboloxía: os muíños de auga conviven coas lendas sobre mouros e o culto ás augas e coas magníficas vistas á ría que ofrece a contorna. Un lugar magnífico do que gozar da calma e natureza e por que non, dun refrescante baño nas augas da poza. Un lugar que fai as ledicias da cativada. O miradoiro de Fontenla, que está próximo, é outro lugar especial dende o que ter boas vistas.
Para sendeiristas que lles gusta deleitarse coas mellores vistas, a subida á cruz da Paralaia é unha das mellores opcións no concello de Moaña. Pese a que non é a máis longa das rutas, é bastante intensa en canto ao ascenso; pódese comezar dende a área recreativa do Leñador (outro espazo de lecer agradable) e dende alí tomar polo camiño que aínda hoxe en día se emprega o 25 de xullo para ir en romaría a Santiago de Ermelo (en Bueu). Dende a cruz, as vistas son privilexiadas con Moaña aos nosos pés, podendo observar boa parte da ría de Vigo. Este camiño coincide cunha das rutas BTT.
Ata o 5 de abril estará aberto o período de preinscrición na Escola Infantil do campus de Pontevedra, que contará con catro aulas e 51 prazas
Puedes encontrarnos en nuestras redes sociales o, si lo prefieres, ponerte en contacto con nosotros a través de contacto@metropolitano.gal
Saber todo lo que ocurre en Vigo y su área metropolitana es ahora más sencillo, rápido y directo gracias al nuevo servicio de alertas de WhatsApp de Metropolitano.gal
© Hansei Media SL