A feira ECOartesá de Moaña chega con 50 postos de artesanía, gastronomía e agricultura sustentable

Ao redor de 50 postos de artesanía e de agricultura sustentable chegarán esta fin de semana ao concello de Moaña para celebrar unha nova edición da Feira ECOartesá, convertida xa nun referente en Galicia. Terá lugar este domingo, 12 de setembro, na contorna do Palco da Música de Moaña (avenida de Concepción Arenal).

A cita, que conta cunha alta demanda de artesáns de toda a comunidade, leva celebrándose dende fai seis anos e “venceu” incluso á pandemia ao contar cunha edición especial no pasado verán. “A primeira edición tivo un éxito tan abraiante que continuamos apostando por ela e consolidouse como referente”, explica a concelleira de Promoción Económica, Coral Ríos, para sinalar que “contribúe ao negocio da hostalaría local ao mover moita xente ao longo de toda a xornada”.

Másnoticias

Bueu ofrece este verano cuatro sorprendentes rutas gratis para descubrir su naturaleza y su historia

28/06/2025

Moaña anuncia un verano de película con cine al aire libre gratis

26/06/2025

O seu horario prolongado, de 11:00 a 21:00 horas, permite distribuír aos asistentes para evitar aglomeracións, aínda que o recinto contará coa coordinación da Protección Civil. Ao longo da xornada a cita contará cunha exhibición dun cesteiro que amosará o seu traballo tradicional en directo.

Os asistentes poderán atopar produtos de artesanía, xoiería, antigüidades, mobles, minerais ou roupa tradicional, entre outros, pero tamén de alimentación como queixos, mel, embutido, pan artesán ou petiscos árabes. Amais, no apartado gastronómico volverá haber churrasco e polbo, que ademais contará con “haimas” con mesas burbulla para grupos familiares, separadas entre si.

A cita, que permite achegarse aos produtos da terra, tamén está pensada para os nenos e nenas da casa. Para eles haberá dous obradoiros da man de Matrácala. As 12:00 horas a rapazada que asiste poderá entrar en contacto co traballo da horta e aprender a cultivar en primeira persoa, mentres que ás 17:00 horas o obradoiro estará dirixido a ensinar á rapazada a distinguir as follas das árbores que viven na nosa contorna.

No apartado musical, a Feira ECOartesá de Moaña contará con sesión vermú ás 12:30 horas da man de The Lelli Kelly’s, o espectáculo “A voar” de Ce Orquestra Pantasma ás 18:30 horas e a actuación da Banda de Música Popular Airiños do Morrazo ás 19:30 horas. A zona de actuacións estará perimetrada e contará con cadeiras e puntos de acceso vixiados pola Protección Civil de Moaña.