Moaña invoca o espírito do Samaín entre cativos e maiores

Co obxectivo de “conmemorar a tradición do Samaín, e os nosos lazos co mundo celta”, en palabras da alcaldesa de Moaña, Leticia Santos, a vila do Morrazo celebra este martes, 31 de outubro, a súa festa máis terrorífica.

O programa, en colaboración coa Asociación Cultural Fontenla, arranca ás 17:00 horas da tarde con obradoiros de maquillaxe, na contorna do Palco da Música, detrás do Mercado Municipal. Alí, instalarase unha carpa –aínda que as previsións meteorolóxicas son máis primaverais que outonais- con diferentes ambientes e actividades.

Másnoticias

Un helicóptero de Salvamento rescata a dos tripulantes de una embarcación de recreo en Bueu

28/05/2022

Bueu recupera a súa gran festa gastronómica, volve a Festa do Polbo á vila morracense

25/05/2022

“A carpa estará dividida en sectores con actividades que terán continuidade con respecto as do ano pasado, que foi un éxito”, explicou Carlos Rúa, da A.C. Fontenla, na presentación desta mañá na casa do Concello.  Así, ademais dos mencionados obradoiros, tamén haberá outras actividades como a “caixa adiviña” na que a rapazada poderá “tocar todo tipo de obxectos terroríficos e adiviñar de que se trata”. Tamén se instalará unha zona con diversos xogos populares.

Pero o Samaín de Moaña non soamente é para os cativos, senón que os maiores poderán gozar dunha festa máxica. “Tamén nos gusta disfrazarnos”, aclarou a concelleira de Promoción Económica e Comercio, Coral Ríos, quen afondou na idea de crear unha festa que fora “máis alá da programación de verán” a través do fenómeno do Samaín. Unha celebración que conta cunha vertente cultural ao “canalizar o evento cara a nosa orixe celta”.

Así, esta segunda edición da Festa do Samaín permitirá aos adultos participar nun certame de disfraces nos que se buscará o aspecto máis terrorífico e orixinal. Dende ás 22:00 horas na contorna do Mercado Municipal o DJ Orli será quen poña a música para que a festa non pare.

Foodtruck e espazo para cativos

Tendo en conta a “gran afluencia de público” da pasada edición, en verbas da rexedora municipal, este ano decidiuse potenciar os actos cun espazo para que os máis cativos poidan descansar e estar atendidos á vez que os pais desfrutan do evento. Por isto, haberá unha zona delimitada na que diferentes monitores se encargarán de que os nenos e nenas conten coa supervisión necesaria.

En canto á gastronomía, que non pode faltar nunha festa galega, a organización traerá un foodtruck –un camión gastronómico- e contará tamén con zona de bebidas. Todo para “honrar as nosas tradicións”, segundo apuntou Leticia Santos, á vez que a poboación “participa en festas máis alá do verán”.