Unión de culturas a través da música para celebrar o día de Galicia en Tui

En Tui son expertos na fusión de culturas a través da música. Cada un dos recunchos da vila, cada un dos festivais organizados alí, contan cunha máxica atmosfera de fusión cultural entre poboacións estranxeiras, nomeadamente con Portugal. Non en van, conforman a chamada “Eurocidade” xunto con Valença. Os tudenses están afeitos, polo tanto, a unión natural dos pobos. Porén, en Rebordáns levan 18 anos chegando aínda máis lonxe coa súa Noite Internacional do Miño.

Na noite deste martes, día de Galicia, o parque do Laxal acolle unha celebración única e abraiante: o folk do mundo únese nun recuncho fronteirizo dunha área rural para celebrar a irmandade a través do son.

Másnoticias

Baiona pone fecha al regreso de su "festival flotante" gratuito para poner a bailar a la playa de Barbeira

22/07/2026

Una marca de moda inédita en Galicia llega con su primera apertura en el Outlet de Tui

22/07/2026

Este ano, a Noite Internacional do Miño recibirá a grupos de tres continentes diferentes e de culturas ben dispersas. No Laxal sonará a música autóctona de Xeorxia, Letonia, Kenia e México, amais da galega, da man dos membros do Centro Cultural San Fins de Rebordáns, organizadores do evento.

Que grupos estarán na edición deste ano?

Dende Xeorxia chega o folclore do TSU Folk Dance Ensemble University. Fundado en 1996, caracterízase polo emprego da música tradicional xeorxiana combinada con danzas individuais e de grupos nas que destaca a forza, a axilidade e os movementos audaces.

Do norte de Europa, nomeadamente dende Letonia, chega o grupo Folk Dance Ensemble Ritenitis, que conta con 70 anos de historia ás súas costas. O nome do grupo fai referencia a unha vella danza etnográfica. O grupo acumula actuacións en numerosos festivais internacionais nunha quincena de países, entre os que se atopan Finlandia, Portugal, Rusia ou Alemaña. A pesar da súa longa historia, caracterízase polo seu carácter xuvenil, cunha media de idade de 23 anos, e o seu repertorio inclúe unha ampla variedade de bailes e xogos das rexións de Letonia.

O representante africano chegará dende a capital de Kenia. Trátase do Nairobi Dance Esemble, que reflicte as tradicións dos distintos grupos étnicos recollendo as danzas tribais que representan o matrimonio, o nacemento, a colleita... Todo coa inconfundible música folclórica kenyana.

O cartel complétase coa Compañía Mexicana de Danza Folclórica. Fundada en 2002, busca reflectir as tradicións ,a paixón e o misticismo do pobo mexicano con espectáculos que cheos de colorido e nos que se realiza un repaso histórico da cultura mexicana pre e post colombina.

O festival está afeito ás músicas étnicas e a celebración da cultura. Nestes 18 anos ten recibido grupos de todas partes do mundo, dende Togo a Xapón, pasando por Indonesia, Perú, Venezuela, México, Serbia, Polonia, Taiwan, Arxentina, Ecuador, Turquía, Eslovaquia, Senegal...

Como chegar?

O festival comeza ás 21:30 horas do martes, 25 de xullo no Parque do Laxal. Para chegar, deberás guiarte polas indicacións cara ao Colexio Público de Rebordáns xa que o Centro Cultural e o propio parque atópanse ás costas do centro. Podes consultar a localización concreta no mapa que te deixamos a continuación: