A fin de semana na que a maxia do jazz invade o corazón de Vigo

O Festival de Jazz de Vigo, organizado polo Concello de Vigo, espállase por toda a cidade xa desde o mesmo sábado de mañá, para chegar a todos os públicos.

Así, o festival empeza as mañás da fin de semana coa actividade infantil Música na Maleta, programada en dúas sesións independentes, unha o sábado e outra o domingo. O espectáculo é a proposta lúdico-educativa para achegar os nenos e nenas de entre 5 e 12 anos ao mundo sonoro mediante a creatividade, a investigación e a manipulación de materiais cotiáns aos que se lles dá unha utilización totalmente distinta ao seu uso habitual. Da man dun dos pedagogos especializados en educación musical infantil máis prestixiosos, Tomás Rábanos.

Másnoticias

Liquidación total de una de las tiendas vintage de Vigo con ropa a 3€ y descuentos hasta el 80%

08/07/2025

Aterriza en el centro de Vigo una marca internacional para eliminar el "tatuaje erróneo"

08/07/2025

Para a tarde do sábado, na praza da Princesa ás 18:30 horas, unha proposta local. En 2012, o saxofonista de jazz lituano Rolandas Butkevicius, logra facer realidade unha teima: baixo o amparo da asociación de veciños Emilio Crespo de Navia, crea unha banda que terá como obxectivo alcanzar a estrutura, aparencia e sonoridade auténticas das grandes "big bands" norteamericanas da primeira metade do século XX, seguindo as tradicións marcadas por Glenn Miller, Benny Goodman, Duke Ellington e Count Basie: a Big Bang Band, formada por cinco saxos, tres trompetas, tres trombóns, guitarra-voz, piano, contrabaixo e batería.

A actuación do Auditorio do sábado lévanos a un son que hai que descubrir por un mesmo. No transcurso dunha carreira estelar de máis de 30 anos, Kenny Garrett converteuse sen dúbida no saxofonista alto máis importante da súa xeración. Ganador dun Grammy en 2010 ao mellor álbum de jazz instrumental e cinco veces nominado, nomeado en 2011 doutor honorífico polo Music Berklee College.

Desde o seu primeiro concerto coa Orquestra de Duke Ellington en toda a súa carreira, pasando tempo e compartindo con músicos como Freddie Hubbard, Woody Shaw, Art Blakey & The Jazz Messengers ou Miles Davis, Garrett sempre tivo un son característico e unha melodía moi distintiva incluso en diferentes linguaxes ou “situacións musicais”.

Nos últimos vinte anos, seguiu crecendo como compositor e como líder da súa propia banda. Editou o seu último disco ata agora “Do your dance”, caracterizado en parte por contar con estruturas sinxelas, melodías previsibles, solos auténticos da marca Garrett e con tremendo Groove, inclúe desde o straight jazz hasta o jazz máis contemporáneo a “46 revolucións”, mesmo tintes caribeños e xestos a músicos como Corea ou Chucho Valdés. Kenny Garrett actuará xunto a Vernell Brown (piano), Corcoran Holt (contrabaixo), Samuel Laviso (batería) e Rudy Bird (percusión). O concerto será no Auditorio do Concello ás 20:30 horas. O prezo da entrada é de 8 euros.

As previsións con posibilidades de chuvia propiciarán que o Manolo Gutiérrez Trío actúe a cuberto. O recital será ás 23:00 horas no Auditorio Municipal do Concello de Vigo. Este pianista fundamentalmente autodidacta, aínda que ten participado de maneira habitual en seminarios e clases mestras e particulares de piano, harmonía e composición conta cunha carreira profesional que abarca desde o rock, o folk, a world music, o blues, o jazz e as gravacións como músico de sesión ata a composición de música para teatro e documentais. Na actualidade traballa fundamentalmente con Sumrrá, xunto a Xacobe Martínez e Lar Legido, e como profesor de piano e combo no Estudio Escola de Música. Nesta ocasión, este trío é unha proposta fundamentalmente jazzística, aínda que aberta á interacción con outras estéticas. O son do grupo está baseado en composicións orixinais e na procura dun espazo sonoro común no que poidan convivir as propostas musicais dos seus compoñentes. A idea é partir da liberdade individual para conseguir un son conxunto; ou sexa, que cada un achegue as súas ideas e a súa personalidade, poñéndoas ao servizo da causa común, cunha visión extensa do feito musical libre de ataduras e clixés. Ten un disco editado: Illa da Lúa, con Tom Warburton no contrabaixo e Dani Domínguez na batería. Tras un descanso para atender outros proxectos, está de novo en marcha, esta vez con Iago Fernández na batería e cun novo disco gravado.

Non faltarán as jam sessions (que chegarán ás 24:00 horas e de balde) como broche final de cada un dos días, nas que o público poderá vivir desde moi preto eses momentos que van compartir os músicos de todos os niveis e procedencias. Unha oportunidade única, tanto para os creadores da arte como para o público, de vivir a maxia da música. Os escenarios elixidos para as jams son os locais que apostan por ofrecer unha programación de jazz constante, porque grazas a eles esta demanda se ve cuberta durante todo o ano.

A do sábado, no Café Vitruvia, será a cargo do Max Gómez Cuarteto. Max Gómez, músico galego, participou en numerosos festivais de jazz. Estudou ademais en Nova York cos grandes mestres do jazz como Kendrick Scott, Miguel Zenón, Ben Street, Marcus Strickland, etc. A formación é Max Gómez (batería), Juansy Santomé (contrabaixo), Xosé Miguélez (saxo) e Sunil López (piano).

A jam do domingo, tamén no Vitruvia, correrá da man do Dani Font Quartet. Nesta ocasión o guitarrista vigués Dani Font incorpora a figura do xenial saxofonista portugués José Soares ao seu trío de xa longa traxectoria, do que forman parte Álex Touceda (contrabaixo) e David Puime (batería). Este proxecto acada así un son sólido e firme, fortemente arraigado na linguaxe do jazz, na súa versión máis lírica e innovadora.

A actividade programada para a tarde do domingo na praza da Princesa, tamén ás 18:30 horas, conxuga música jazz e baile de xeito que pretende conquistar e sorprender os viandantes. Ao son de The Alley Stompers, os grupos de baile Swing On Vigo e Mayeuswing demostrarán a súa habilidade, ao mesmo tempo que invitarán a participar a quen así o desexe.

The Alley Stompers son dixieland, jazz, blues e swing. Este espectáculo representa unha viaxe no tempo, un retorno de sensacións, que recrea a atmosfera da Nova Orleáns dos anos 20 e 30 revisando o repertorio que fai honor a esta época dourada do jazz. Os seus compoñentes, músicos profesionais de grao, todos eles moi activos e coñecidos no panorama jazzístico galego: o italiano Rosolino Marinello ao clarinete e os saxos, o francés Nacho Pérez ao banjo, os galegos Antonio Otero, voz e saxo tenor, Óscar Prieto á tuba e Chus Pazos á batería. Son una formación vistosa, potente, organizada en torno aos instrumentos máis tradicionais do jazz, ao máis puro estilo das bandas tradicionais americanas. É un espectáculo que está pensado para gozalo bailando ou desde unha butaca (representación en teatros) e resulta ideal para todos os públicos. O ritmo, a calidade musical e o bo humor son a tarxeta de visita de The Alley Stompers.

https://www.youtube.com/watch?v=bjF2UqHwv7M

A posterior cita do domingo é con Charenée Wade. Entre as revelacións vocais máis destacadas do circuíto do jazz sobresae por méritos propios esta vocalista afromaericana: Primeira finalista no Concurso Internacional Vocal “Thelonius Monk” ou intérprete do “Betty Carter's Jazz Ahead Program” no Kennedy Center, Washington. Charenée Wade, ademais de ser unha das cantantes con máis proxección do jazz internacional, é unha grande compositora, “arreglista” e educadora. Chegou a formar parte dos únicos catro talentos escollidos para formar parte do obradoiro de músicos de Dianne Reeves no Carnegie Hall.

Un concerto no que presenta un repertorio a modo de homenaxe, ofrenda necesaria e á súa vez estimulante, da música de Gil Scott Heron, cunhas dinámicas sorprendentes, innovadoras e de vangarda, recordando nalgúns momentos ese timbre e a garra de Betty Carter ou Sarah Vaughan e que provoca tamén a gravación do seu segundo álbum “Offering” (2015), no que contou con músicos como Lonie Plaxico, Stefon Harris, Marcus Miller ou Christian Mcbride. Charenée Wade (voz), Oscar Pérez (piano), Paul Beaudry (contrabaixo) e Marc Ayza (batería). O concerto será ás 20:30 horas. O prezo da entrada é de 8 euros.