A feira EmpregoInCampus porá en contacto o alumnado con máis de 100 empresas

Co obxectivo de facilitar os primeiros achegamentos do alumnado ao mundo laboral, a Universidade de Vigo volverá celebrar esta primavera as súas feiras EmpregoInCampus. Esta iniciativa, que naceu en 2022, ten como obxectivo pór en contacto os titulados e tituladas e estudantes dos últimos cursos con empresas colaboradoras que están buscando talento nas aulas universitarias. A cita no campus de Vigo será o 3 de abril, nas facultades de Ciencias Xurídicas e do Traballo e de Ciencias Económicas e Empresariais, e o 9 de abril en Ourense, no pavillón universitario de deportes. A data para esta cita no campus de Pontevedra está aínda por definir.

Máis de 100 empresas rexistradas

A finalidade destas tres feiras é brindar á comunidade universitaria a oportunidade de coñecer de primeira man as oportunidades profesionais que ofrecen as máis de 100 entidades xa rexistradas procedentes de moi diversos sectores e contactar directamente cos seus responsables de selección. Xunto coa visita aos postos, durante a feira desenvólvense varias actividades complementarias. Por unha banda, as persoas visitantes terán á súa disposición o Pasaporte de Empregabilidade, un espazo no que poderán recibir asesoramento sobre o seu CV e facerse unha foto de calidade para o seu CV ou redes sociais profesionais. Tamén se poderán entregar currículos ás empresas a través dun código QR que se xerará no momento de facer a inscrición.

Másnoticias

¿Cómo son los arquetipos femeninos del género de terror? Un curso los analiza en Vigo

04/06/2026

El fotógrafo de Vigo que conquista a España con la imagen de un fotomatón

03/06/2026

A directora da Área de Emprego e Emprendemento, Maruxa Álvarez, convida tanto a alumnado como a recentes titulados e tituladas a achegarse a estas feiras, e lembra que non é “unha actividade que implique a inversión da xornada enteira, basta con que se rexistren previamente na web, preparen o seu CV e se pasen a visitar aqueles postos que resulten do seu interese”. É, recalca, “unha oportunidade única en todo o curso académico e non todas as universidades teñen o privilexio de poder organizar” e que neste caso conta coa colaboración do Consello Social, Eures e o Campus da Auga.

Antes da celebración das feiras, as persoas participantes poderán preparar a súa candidatura nun dos obradoiros organizados con este fin. Ademais, as persoas interesadas poderán asistir, de balde e unha vez realizada a inscrición, ás actividades organizadas desde o Foro Talento-Fundamental.

Unha oferta adaptada ao alumnado de cada campus

Como explica a directora da Área de Emprego e Emprendemento “algunhas das empresas repiten en varios campus, pero moitas outras só acoden a un deles, adaptándose así a oferta de entidades ao perfil do alumnado e persoas tituladas en cada caso”. Nesta edición, a organización decidiu non organizar actividades formativas paralelas, poñendo así o foco no obxectivo da feira “que non é outro que dar a coñecer ao alumnado unha mostra moi importante da oferta laboral actual e permitirlles contactar directamente coas persoas representantes daquelas empresas e entidades que puideran acollelos como parte dos seus equipos de traballo, ben como estudantes de prácticas, ben como titulados e tituladas”, destaca Álvarez.

Neste sentido, a responsable da Área de Emprego e Emprendemento lembra que a asistencia a este tipo de feiras achégalle ao alumnado “moito máis valor do que ao principio poden pensar, xa que lles facilita o acceso directo a entidades do seu interese”. Recalca que é importante achegarse a falar cos responsables de recursos humanos e entregar currículos, “é unha carta de presentación excelente que hai que aproveitar”.

3 de abril, cita en Vigo e unha semana despois en Ourense

A primeira cita da xeira das feiras EmpregoInCampus deste 2025 será no campus de Vigo o vindeiro 3 de abril, entre as 10:00 horas e as 18:00 horas nas facultades de Ciencias Económicas e Empresariais e de Ciencias Xurídicas e do Traballo. O alumnado interesado, que pode inscribirse a través desta ligazón, atoparase con empresas como Adecco, Agencia Estatal de Administración Tributaria (AEAT), Avícola de Galicia, Baltar Abogados, Banco de España, BDO Auditores, Codisoil, Decathlon, Deloitte, Forvis Mazars, Fundación Impulsarse, Garrigues, Grupo Profand, Occident Mediación ou Redegal, entre outros.

A seguinte semana, concretamente o día 9 de abril, EmpregoInCampus trasladarase ao campus de Ourense, con postos informativos e actividades no Pavillón universitario de deportes de 10:00 a 18:00 horas. Nesta cita, na que xa se poden inscribir, participarán empresas como Aceites Abril, Aertec Solutions, Agencia Estatal de Administración Tributaria (AEAT), Alén Space, Arias Avogados, Atelier Social, Balidea, Ceesg, Centro se Desenvolvemento Rural O Viso, Centro Penitenciario Pereiro se Aguiar, Codisoil, Coren, Gradiant, LexAuria, Ministerio de Defensa ou Uría Menéndez Abogados, entre outras compañías e entidades.

No que atinxe ao campus de Pontevedra, Álvarez avanza que a idea é “repetir a modalidade que se fixo o ano pasado, con mesas redondas sobre saídas profesionais en ámbitos específicos”. A cita será a finais do mes de setembro.