A UVigo lidera dous proxectos do programa europeo EU-FORA de seguridade alimentaria

A Universidade de Vigo coordina este curso académico dous proxectos EU-FORA, programa de formación da Autoridade Europea de Seguridade Alimentaria (EFSA) de avaliación de risco alimentario. Trátase dos proxectos AlgaeSafe, centrado en aditivos funcionais derivados de algas, e Innov2Safety, de avaliación do risco de substituír conservantes sintéticos por ingredientes naturais. Ao seu abeiro, dúas investigadoras lusas realizan estadías formativas na UVigo.

O programa europeo EU-FORA busca a través das súas bolsas formar especialistas en avaliación de riscos en seguridade alimentaria mediante estancias internacionais en institucións de referencia. As iniciativas, indican desde a Oficina de Proxectos Internacionais da UVigo, reafirman o compromiso da institución académica coa seguridade alimentaria a nivel europeo e impulsan a formación e especialización en avaliación de riscos alimentarios. AlgaeSafe e Innov2Safety, sinalan, "contribúen significativamente ao desenvolvemento do coñecemento en avaliación do risco alimentario e á seguridade alimentaria en Europa" e a Universidade de Vigo, a través destes proxectos, "segue consolidando o seu compromiso coa investigación e a formación neste ámbito”.

Másnoticias

Un estudo da UVigo cuestiona as hipóteses clásicas sobre a alta biodiversidade nos trópicos

26/06/2025

La Universidad de Vigo abre la preinscripción para sus másteres oficiales del curso 2025/2026

24/06/2025

Formación especializada para fortalecer a cooperación

O coordinador dos dous proxectos no caso da Universidade de Vigo é o profesor Miguel Ángel Prieto Lage, investigador do Nutrition Food Group (NuFoG). As dúas iniciativas enmárcanse no Instituto de Agroecoloxía e Alimentación da UVigo, con sede no campus de Ourense, e a súa parte experimental lévase a cabo en laboratorios do grupo en CITEXVI, no campus de Vigo. AlgaeSafe (Algal-derived functional additives for ensured safety and efficacy) ten como obxectivo principal fortalecer a rede de expertos en Europa no seu ámbito, fomentando a formación de persoal investigador que colabore con institucións e científicos séniores para avanzar no campo dos aditivos funcionais derivados de algas. Cunha duración que vai do 1 de setembro de 2024 ao 31 de agosto de 2025, busca mellorar a seguridade e eficacia dos alimentos mediante o uso de aditivos de orixe mariña e analiza os riscos do consumo destes aditivos. A investigadora participante neste proxecto ao abeiro de EFSA é María Aurora Soares da Silva, técnica no Laboratório Associado para a Química Verde (LAQV-REQUIMTE) de Portugal, baixo a dirección da profesora María Fátima de Sá Barroso, coordinadora do proxecto na institución de orixe.

O segundo dos proxectos é Innov2Safety (Risk assessment of replacing synthetic preservatives with natural ingredients). Ten como obxectivo avaliar os riscos asociados á substitución de conservantes sintéticos por ingredientes naturais a partir de subprodutos da industria alimentaria. Nel colabora o Instituto Politécnico de Bragança (IPB) baixo a supervisión da profesora Lillian Bouçada de Barros, coordinadora do proxecto na institución de orixe. Ela forma parte ademais do comité asesor externo do Instituto de Agroecoloxía e Alimentación da Universidade de Vigo, reforzando así a colaboración entre persoal investigador e institucións a un e outro lado da raia. A investigadora lusa Tatiane Cristina Gonçalves de Oliveira, procedente do IPB, é a beneficiaria neste caso do programa EU-FORA, realizando a súa estancia na UVigo durante o período comprendido entre o 1 de setembro de 2024 e o 31 de agosto de 2025, traballando en estreita colaboración co equipo de investigación da Universidade de Vigo.

Este programa EU-FORA permítelles ás investigadoras participantes unha inmersión completa na avaliación do risco alimentario e fortalece a cooperación internacional no sector. Asisten a unha formación estruturada en colaboración coa Autoridade Europea de Seguridade Alimentaria, que inclúe un módulo introdutorio de tres semanas na súa sede en Parma (Italia), seguido de catro módulos adicionais, tres deles en modalidade en liña e un presencial novamente en Parma. Ademais, no marco da súa estadía, as dúas beneficiarias teñen realizado visitas á Axencia Española de Seguridade Alimentaria e Nutrición e ao Centro Nacional de Alimentación en Madrid, fortalecendo os vínculos entre institucións e promovendo a cooperación internacional en seguridade alimentaria. En xuño, como parte das actividades de divulgación relacionadas co proxecto, asistirán á XXIII Conferencia Europea sobre Química dos Alimentos que se celebrará en Bratislava, Eslovaquia. Así mesmo, está prevista a publicación de dous artigos científicos no Journal da EFSA que recollan os resultados dos proxectos.

Continuidade

Esta participación no programa EU-FORA non é a primeira vez que produce, xa que o pasado curso académico, ao abeiro tamén da súa convocatoria de bolsas e tamén baixo a coordinación do profesor Miguel A. Prieto, a investigadora e estudante de doutoramento da Universidade de Vigo María Carpena Rodríguez realizou unha estancia de tres meses na Warsaw University of Life Sciences (Polonia) nun proxecto chamado AherbsFlowersAlgae, centrado en avaliar exhaustivamente os riscos co consumo das plantas silvestres comestibles (herbas e flores).