A UVigo presenta a súa oferta académica a máis de 1000 estudantes de institutos de Vigo e a súa área

Dende primeira hora da mañá deste mércores, á xa habitual vida académica do campus de Vigo sumáronse máis de 1000 mozos e mozas de institutos de Vigo e a súa contorna. Todas e todos eles pasaron esta mañá no campus no marco das XOU, Xornadas de Orientación Universitaria, a través das cales a UVigo amosa a súa oferta académica ao alumnado pre-universitario. O obxectivo da Vicerreitoría de Estudantado e Empregabilidade con esta iniciativa é achegarlles a todas e todos eles a información precisa para que poidan tomar unha das decisións máis importantes da súa vida, a de elixir carreira unha vez superen a ABAU, que este ano se celebrarán en Galicia os días 3, 4 e 5 de xuño.

Como destacaba a vicerreitora de Estudantado e Empregabilidade da UVigo, Natalia Caparrini, este é un evento pensado para eles e elas, “para que tomen contacto co mundo universitario, para que coñecen as nosas titulacións e se familiaricen co que se van atopar no seu futuro como estudantes de grao”. Ademais, puxo o foco en que nestas XOU, grazas á presenza de asociacións de estudantes, os mozos e mozas poden coñecer de primeira man as experiencias de estudantes que xa están cursan os seus estudos na UVigo, “é un intercambio que pode ser moi enriquecedor para eles”.

Másnoticias

O tour Alerta Verde leva a divulgación científica a preto de 3500 persoas en toda Galicia

16/07/2026

O CIM analiza se a alcalinización dos océanos é segura para a vida mariña con maior temperatura da auga

16/07/2026

Postos informativos e charlas de asesoramento

Ao longo da xornada, este milleiro de mozos e mozas puideron coñecer non só as titulacións que se ofertan nos tres campus, senón tamén os servizos, instalacións, actividades culturais e deportivas, formación complementaria, asociacións de estudantes, vida universitaria, posibilidades de aloxamento, etc. Todo isto estivo á súa disposición nunha feira que, como vén sendo habitual nos últimos anos, se instala no pavillón universitario do campus de Vigo con postos de cada un dos centros e servizos, dende a Biblioteca Universitaria ou a Área de Benestar, Saúde e Deporte, ata o Servizo de Bolsas, o de Posgrao, Extensión Universitaria ou a Área de Emprego e Empredemento, así como as posibilidades de realizar un voluntariado ou información sobre as actividades de impulsadas polo propio estudantado como as que realizan os mozos e mozas de UVigo Motorsport, de CES UVigo, UVigo Aerotech ou UVigo SpaceLab. Paralelamente, a Facultade de Ciencias Económicas e Empresariais acolleu unha serie de charlas informativas de carácter xeral. Participaron na xornada o Colexio Possumus, IES Valadares, IES Santa Irene, IES República Oriental do Uruguai, Colexio Labor, CPR Plurilingüe Rosalía de Castro e IES Politécnico, todos eles centros de Vigo, xunto co IES Castro Alobre de Vilagarcía de Arousa.

Un evento que se consolida tras o parón da pandemia

Con esta terceira edición, as XOU consolídanse como unha cita referente para o futuro de moitas mozas e mozas da contorna de Vigo. Tras unha primeira convocatoria en 2019, a pandemia fixo que esta feira se trasladase a un formato virtual ata que se recuperou en xaneiro do ano pasado. Agora, con esta nova edición, o evento afiánzase atraendo máis de 1000 estudantes de secundaria na procura de orientación e inspiración para un futuro case inmediato.

Tantas opcións de futuro como estudantes

Entre as e os asistente a estas XOU había opinións moi diversas sobre o seu futuro académico, como as que teñen un grupo de estudantes de 2º de Bacharelato do IES Valadares. David vese estudando unha Enxeñaría, “aínda que non teño claro cal, pero seguro que virei á Universidade de Vigo”, mentres que Marieli explica que “teño claro ir á universidade, aínda que non sei que quero facer, pero será algo relacionado coas artes”. Pola súa banda, Sara afirma que o seu futuro non pasa pola universidade e que estudará Restauración, mentres que Lucía di que optará por estudos de Deseño, aínda que non sabe se na universidade ou non. Mentres, Mateo, Ramsés e Miguel coinciden á hora de asegurar que queren ir á universidade, aínda que ningún dos tres sabe que titulación cursará.

Que a súa formación continuará na universidade é algo no que coinciden dúas alumnas de 2º de Bacharelato do República Oriental do Uruguai (ROU). É o caso de Andrea que quere estudar o programa de simultaneidade ADE-Dereito na UVigo, mentres que Rocío optará por Márketing. Pola súa banda, Marta non ten claro se opositará a policía nacional ou cursará un grao para entrar na escala executiva, “se fixera unha carreira sería Dereito na UVigo”, explica. Na xornada de hoxe moitos deles puideron aclarar dúbidas e delimitar un pouco máis as súas opcións.