Alberto Gago reencóntrase co nivel máis elevado da actividade científica ao ingresar na RAGC

Logo dun período con responsabilidades académicas “no que foi imposible compatibilizar obxectivos e manter a esixencia”, o catedrático de Facenda Pública e exreitor da UVigo, Alberto Gago Rodríguez, reencontrarase, a partir deste mércores 15 de decembro, co gallo do seu ingreso na Real Academia Galega de Ciencias, “co nivel máis elevado da actividade científica”. Gago converterase este 15 de decembro, nun acto que se celebrará ás 19.00 no Pazo de San Roque en Santiago de Compostela, no primeiro académico numerario da UVigo da Sección de Ciencias Económicas e Socias da RACG, que si conta con tres académicos numerarios da institución académica viguesa na Sección de Ciencias Técnicas, Pedro Merino, Fernando Pérez González e Juan José Pazos Arias.

“A nivel persoal, anima comprobar o interese que pode xerar a investigación realizada por un economista público, un facendista, centrado en argumentos de intervención pública”, explica o catedrático, que non agocha a súa satisfacción polo recoñecemento da RAGC “ao traballo realizado desde as Ciencias Sociais”. Neste sentido, Gago destaca que, ao marxe da súa colaboración persoal nas actividades que organice a RAGC, “ o máis interesante da miña incorporación pode derivar do enfoque diferenciado co que nas Ciencias Sociais observamos as interrogantes científicas”. Un bo exemplo desta afirmación é o discurso co que o catedrático de Facenda Pública ingresará na Real Academia Galega de Ciencias, Economía, cambio climático e políticas públicas, no que trata de ilustrar o tipo de investigación que se pode facer desde a Economía para pechar o ciclo científico arredor dun problema tan relevante como o quecemento global. “O cambio climático é un fenómeno ben analizado polas ciencias da natureza. Pero a esta aproximación tradicional, a Economía engade unha investigación sobre as política de adaptación e mitigación e os mecanismo e instrumentos que poden utilizarse para xerar un cambio co comportamento nos axentes económicos”, detalla Gago, que considera tan importante identificar con rigor un problema da natureza (físico, biolóxico, químico), como a aproximación complementaria que achega a Economía, por exemplo, en canto ciencia social ou ciencia do comportamento, para modificar as condutas e tratar de resolvelo.

Másnoticias

O tour Alerta Verde leva a divulgación científica a preto de 3500 persoas en toda Galicia

16/07/2026

O CIM analiza se a alcalinización dos océanos é segura para a vida mariña con maior temperatura da auga

16/07/2026

O discurso de ingreso de Gago será contestado en nome da RAGC polo membro numerario e presidente da Sección de Ciencias Económicas e Sociais, o catedrático de Economía Aplicada da Universidade de A Coruña, José Ramón Cancelo Torre. O presidente da RAGC, Juan Lema Rodicio, abrirá o acto, ao que asistirán, entre outras autoridades, os reitores das tres universidades galegas; a directora xeral de Calidade Ambiental, Sostibilidade e Cambio Climático da Xunta, María Sagrario Pérez, e a presidenta do Consello da Cultura Galega, Rosario Álvarez.

Un recoñecemento non exento “dunha vertixe tristeira”

Fronte ás revisión de medio prazo, “que non obrigan a botar unha ollada global cara atrás”, que a universidade fai á hora de avaliar a actividade docente e investigadora do seu persoal, Gago destaca que un nomeamento como académico deriva dunha especie de resumo xeral de toda a actividade profesional. “Debo confesar, que cando mo comunicaron, sentín algo semellante a unha vertixe tristeira, un espertigo de melancolía ao pensar que estes recoñecementos acostuman a acontecer ao final da túa vida profesional, sen ter en conta o moito que che queda por facer”, recoñece o exreitor, para quen as decenas de promocións nas que tratou de influír nun sentido positivo e moderno para o exercicio profesional, os asuntos tratados, os centos de páxinas escritos, etc., “forman parte do que está virado na patela do peixe. Pero o que importa está sempre por diante”. Con esta visión de futuro, Gago asegura que o seu obxectivo vencellado á ciencia é acadar a ver o encaixe dos países nunha senda sostible para a vida do planeta, “aí quero verme”, afirma.

Campos de traballo

O traballo de investigación de Alberto Gago (Vilanova de Arousa, 1956) desenvólvese nos campos da incidencia impositiva, a reforma fiscal e a fiscalidade ambiental, cuestións sobre as que publicou máis dun cento de libros e artigos en revistas científicas internacionais e nacionais. Doutor en Economía pola USC e catedrático de Facenda Pública da UVigo desde 1994, Gago foi director do Departamento de Economía Aplicada entre os anos 1995 e 2000, vicerreitor de Planificación e Asuntos Económicos (2002-2006) e reitor da UVigo entre 2006 e 2010. Noutros ámbitos, foi membro do Consello Económico e Social de Galicia, do Consello de Cultura Galega, do Consello Científico do Instituto de Estudos Económicos e presidente da Asociación Española de la Energía e do comité científico dos Encuentros de Economía Pública.

O catedrático vigués participou no grupo de estudos de Fiscalidade Comparada do Ministerio de Economía y Hacienda, ou de Fiscalidad de la Energía y Desarrollo Energético, do Instituto de Estudios Fiscales e no grupo para a reforma fiscal, creado pola Fundación Iniciativas, que publicou o informe Una propuesta para la reforma fiscal en España. Na actualidade é membro do grupo Rede, da agrupación estratéxica Ecobas da UVigo e investigador afiliado do Centro de Investigación Economics for Energy.