atlanTTic celebrará a vindeira semana 15 anos impulsando a innovación en telecomunicacións

O Centro de Investigación en Tecnoloxías de Telecomunicación da Universidade de Vigo, atlanTTic, cumpre este ano o seu 15º aniversario, consolidado como un referente na investigación e transferencia de coñecemento en ámbitos estratéxicos como as comunicacións, os servizos dixitais e a ciberseguridade.

Para celebralo organizaron para a vindeira semana diferentes actividades. O primeiro será un acto institucional, o xoves 20, que reunirá autoridades académicas e políticas, así como representantes de empresas do sector e persoal que forma parte do centro, nun encontro destinado a poñer en valor o papel clave da investigación en telecomunicacións no desenvolvemento económico e social de Galicia. Será no Tinglado do Porto de Vigo.

Másnoticias

La Semana de Cine Submarino de la UVigo ofrece más de una decena de proyecciones gratis en la ciudad

13/11/2025

Día de “agradecemento infinito” na UVigo aos 44 docentes e 20 PTXAS xubilados o curso pasado

12/11/2025

Quince anos de avance científico e tecnolóxico

A andaina de atlanTTic comezou en 2010 co obxectivo de impulsar o avance da sociedade mediante investigación de excelencia e transferencia de coñecemento en áreas clave para a transformación dixital. Hoxe, quince anos despois, o centro é referente na Rede Cigus da Xunta de Galicia, reúne máis de 200 profesionais e consolídase como un dos polos científicos e tecnolóxicos máis relevantes do ámbito galego e estatal.

Nesta liña, o director de atlanTTic, Martín Llamas Nistal, subliña que “desde o centro queremos lembrar que a investigación non é algo abstracto ou afastado: está aí, transformando silenciosamente o presente e construíndo o futuro. Queremos seguir deseñando ese futuro desde Galicia, conectando o talento, a innovación, o ecosistema de I+D e a sociedade».

Un motor para o ecosistema tecnolóxico galego

Ao longo destes 15 anos, atlanTTic contribuíu de forma decisiva a situar Galicia na vangarda da innovación, impulsando proxectos e infraestruturas punteiras como o Vigo Quantum Communication Center (VQCC) ou a futura fábrica de semicondutores SPARC, que reforzan o liderado da comunidade en ámbitos como a fotónica integrada ou as tecnoloxías cuánticas.

O seu persoal investigador destaca en áreas como as comunicacións B5G e 6G, a fotónica integrada, a intelixencia artificial, o procesamento de linguaxe natural, as tecnoloxías aeroespaciais, a ciberseguridade ou as tecnoloxías cuánticas, desenvolvendo proxectos con impacto directo na industria e no día a día das persoas.

O compromiso coa transferencia reflíctese tamén na creación dun ecosistema emprendedor robusto, con cinco empresas derivadas (spin-offs) activas —entre elas, Alén Space, integrada hoxe no grupo GMV— que en 2024 superaron conxuntamente os cinco millóns de euros de facturación. Entre 2020 e 2024, o centro mobilizou 11,8 millóns en contratos e convenios con empresas e 39,8 millóns en financiamento competitivo, que o consolidan como o centro líder da UVigo na captación de fondos e na transferencia ao tecido produtivo.

O venres 21 ‘atlanTTic sae á rúa’

Ao día seguinte desta celebración, o venres 21, celebrarase tamén a oitava edición da súa xornada de portas abertas, Conecta con atlanTTic, que por primeira vez terá lugar no Tinglado do Porto de Vigo.

Baixo o lema Está aí, pero non o ves, a actividade convida a descubrir a ciencia que permanece oculta pero que fai posible a tecnoloxía que usamos cada día. Pola mañá, de 10:00 a 13:00 horas, desenvolveranse actividades dirixidas a centros escolares, e pola tarde, de 16.00 a 19.00 horas, a xornada abrirase ao público xeral. A entrada é de balde, con inscrición previa a través da web de atlanTTic.

Durante toda a xornada, investigadores e investigadoras do centro amosarán de maneira amena e participativa os seus últimos avances en tecnoloxías de telecomunicación, con demostracións e experiencias interactivas. O público poderá ver en funcionamento un dron con conectividade 5G, o robot cuadrúpede Santi, maquetas de nanosatélites e proxectos de comunicacións cuánticas, fotónica ou intelixencia artificial.

“En conxunto, falamos dunha mostra que permitirá descubrir como a investigación feita en Galicia impulsa o futuro das telecomunicacións. É unha oportunidade única para coñecer de preto como a ciencia que se fai en atlanTTic transforma o noso día a día”, destaca Llamas.