‘Bibopalula’ leva o galego ás pantallas nunha animación musical infantil

‘Bibopalula’ é a primeira serie de animación musical para televisión realizada íntegramente en galego. Producida por Undodez, marca un antes e un despois no audiovisual infantil galego, ofrecendo contidos pensados para cativada de entre 3 e 6 anos que mesturan entretemento, música e aprendizaxe. Os primeiros vinte episodios pódense desfrutar na plataforma dixital xabarin.gal e na aplicación móbil Xabarín.

A Banda do Bosque, protagonista desta serie, está composta polo paporrubio Robin, o merlo Merli, a pega Pegui e o picapau Carpin. A través de historias breves de cinco minutos, os catro amigos enfrontan pequenos misterios inspirados polos ciclos naturais, como o cambio das estacións ou a migración das aves, descubrindo valores como a amizade, a curiosidade e o respecto pola natureza.

Másnoticias

La DGT aclara si el polémico nuevo radar que controla la distancia llegará a Galicia

30/08/2025

Copernicus ajusta la estimación de hectáreas quemadas en Galicia este agosto

29/08/2025

Cada episodio inclúe unha canción orixinal composta por Santi Jul e Iván Laxe. Estes temas, interpretados pola Banda do Bosque nun videoclip ou ao vivo no escenario do bosque, están dispoñibles tamén nas principais plataformas dixitais de audio, permitindo que a experiencia musical continúe fóra das pantallas.

Unha aposta firme polo audiovisual en galego

Creada por Laura e Andrés Mahía, ‘Bibopalula’ é unha produción completamente galega, pensada para conectar coas familias e reforzar a presenza do galego no audiovisual infantil. Esta visión foi apoiada por un elenco de voces recoñecidas, entre as que destacan Melania Cruz, Marta Lado, Iria Lamas, Marita Martínez e Xosé Antonio Touriñán.

A música é o gran eixe de ‘Bibopalula’, un elemento que complementa as historias e transmite as súas aprendizaxes de forma inesquecible. Pero a serie tamén traspasará as pantallas xa que, durante os próximos meses, o proxecto ampliarase con novas iniciativas como a publicación dun conto infantil baseado nos seus personaxes e unha aplicación móbil que permitirá ás familias explorar o mundo da serie de maneira interactiva.

Ademais, para o vindeiro ano, está previsto o lanzamento dunha unidade didáctica destinada a centros educativos, que combinará actividades musicais e contidos sobre o coidado da natureza. A Banda do Bosque tamén visitará escolas para compartir aventuras co alumnado e reforzar a aprendizaxe a través de experiencias lúdicas.

Nunha aposta por levar as súas historias máis aló das pantallas, a produtora Undodez, en colaboración coa compañía Ainé, traballa nun espectáculo musical en vivo que trasladará a maxia de ‘Bibopalula’ aos escenarios galegos.

A serie contará cun total de 55 episodios

‘Bibopalula’ non só enche un baleiro no panorama do audiovisual infantil, senón que tamén reivindica o galego como lingua de creación contemporánea, capaz de conectar coas novas xeracións. Logo destes 20 primeiros capítulos, a temporada completarase cun total de 55 episodios das aventuras de Robin, Pegui, Carpin e Merli.

Para estar ao día de todas as novidades de ‘Bibopalula’, podes seguir as súas contas nas redes sociais Facebook e Instagram ou visitar bibopalula.gal, a plataforma de referencia desde a que acceder a todos os contidos da serie.