O BNG de Vigo alerta da “burla e estafa” da nova tarifa da auga

A poucos días de que conclúa o prazo aberto de alegacións cidadás á modificación da tarifa do servizo de abastecemento da auga e saneamento do Concello de Vigo, o Bloque Nacionalista Galego mantivo un encontro coa Asociación Galega de Consumidores/as e Usuarias/os (Acouga), na que puxeron en común a valoración do novo recibo.

Na xuntanza, que se desenvolveu en formato telemático, tomaron parte Xoán Antón Pérez Lema, avogado e secretario xeral de Acouga, e mais o portavoz municipal do Bloque en Vigo, Xabier P. Igrexas. Ambos os dous cadraron en criticar a modificación aprobada inicialmente no Pleno do 30 de setembro con apenas os votos do PSOE.

Másnoticias

Nace un nuevo festival en distintos escenarios de Nigrán con conciertos gratis durante el atardecer

21/07/2026

Una "patisserie" que llegó hace un año a Vigo inaugura su segundo local con dos días de café gratis

21/07/2026

Igrexas cualificou de “estafa e burla á histórica reivindicación veciñal” o novo sistema tarifario. “Non haberá cobro por consumo real, porque se incrementan nun +276% as cotas fixas para usuarios e usuarias domésticas e que representarán máis do 80% do recibo. Tampouco se producirá un aforro real, xa que para consumos de menos de 6m3 ao mes só habería unha rebaixa de 55 céntimos na factura”, explicou. O edil nacionalista lembrou que os propios informes municipais recollían a previsión de que coa nova tarifa a recadación será a mesma. “En resumo, o grande cambio que patrocina Caballero, suporá pagar o mesmo por menos consumo”, asegurou.

Pola súa parte, Pérez Lema expresou a súa coincidencia coa emenda formulada polo BNG e que foi rexeitada polo grupo de Goberno e advertiu de que para alén da “inxustiza” en termos sociais do novo recibo esta estrutura tarifaría podería resultar ilegal ao incumprir o recollido na Directiva Europea da Auga. Neste sentido, Acouga anunciou que presentarán unha alegación en contra da modificación aprobada e non descartan emprender outras accións pola vía administrativa ou xudicial. “Non vai haber un cobro por consumo real e pola contra aumentan de maneira moi importante as cotas de servizo”, denuncia.

Campaña de denuncia nas redes

O Bloque Nacionalista Galego iniciou onte unha campaña informativa e de denuncia a través das redes sociais. Baixo o lema “Nova tarifa da auga en Vigo? Mesma estafa!”, o Bloque divulgará diferentes materiais explicativos en formato dixital e un microvídeo “desmontando a propaganda e deixando en evidencia o calote que suporá o novo recibo”, explican. As publicacións desta campaña nos perfís do BNG de Vigo nas redes sociais Facebook, Twitter e Instagram xa superaron as 8.300 visualizacións en apenas 24 horas.

Aliás, a fronte nacionalista fixo público na súa web (premer aquí) un modelo de alegación e anima ao conxunto da veciñanza a rexistralas para facer constar o descontento social.