O BNG defende a recuperación integral de Samil fronte ao proxecto de “máis cemento” actual

O Bloque Nacionalista Galego vén de presentar a súa alternativa ao proxecto do Ministerio para a Transición Ecolóxica e o Reto Demográfico (MITECO) para a recuperación integral da praia de Samil e a rexeneración do seu sistema dunar. Na opinión da fronte nacionalista, o proxecto actual insiste no modelo “errado e ambientalmente depredador” que se perpetrou coa construción do actual paseo nos anos 70, polo que defenden un plan alternativo. “Se o Goberno español non rectifica este proxecto estaremos diante dunha grande oportunidade perdida para recuperarmos de verdade o areal de Samil e restituír os seus enormes valores ambientais”, valorou en rolda de prensa o concelleiro e candidato do BNG á Alcaldía de Vigo, Xabier P. Igrexas.

O edil nacionalista criticou que a actuación prevista polo de agora se limite a 250 metros (da punta de Samil até a antiga concesión do Camaleón) dos case dous quilómetros de praia, recuando 25 metros o paseo e "instalando un novo muro de formigón". Cuestionou tamén que o proxecto "non conte cunha proxección de conxunto e cunha perspectiva de longo prazo", ademais de carecer dunha avaliación ambiental “consistente” que teña en conta estudos científicos académicos recentes sobre a propia dinámica da praia.

Másnoticias

Protestas ante un colegio de Vigo por el estado del tejado: "Hasta que se caiga no lo van a arreglar"

30/05/2025

Dos restaurantes podrían convertir a Vigo en la capital de México con sus sabrosos tacos

29/05/2025

“Para o BNG non ten ningunha xustificación insistir en cementar de novo a praia de Samil”, defendeu Igrexas, que chamou a apostar por outros modelos ambientalmente máis sustentábeis e que permitiron, con éxito, recuperar sistemas dunares como no caso da praia do Vao. A alternativa nacionalista, explicou, pasa por substituír o formigón por un sistema de pasarelas de madeira, pivotadas en altura, cun ancho máximo de oito metros fronte aos 12 que se proxectan.

Ademais, o candidato do Bloque considerou “fundamental” incorporar un proxecto integral que inclúa unha auditoría ambiental, cun modelo baseado nos datos do estudo publicado en 2020 polo Centro de Investigacións Mariñas. “Para determinarmos co máximo rigor científico o alcance do recuamento do actual paseo para garantir a recuperación real dos valores ambientais de Samil”, aclarou, así como para combater os efectos do cambio climático, en particular no relativo á ameaza do incremento do nivel do mar.

“Samil é unha praia urbana, si, pero o que temos que conseguir é que deixe de ser unha praia urbanizada”, remachou o concelleiro nacionalista, que considerou unha tarefa “estratéxica” reconciliar Vigo co seu medio litoral para avanzarmos cara unha cidade máis verde e sustentábel ecoloxicamente.