O Campus Auga financia seis proxectos de I+D con potencial de explotación e impacto no mercado

O Campus Auga, o proxecto de especialización do campus de Ourense, puxo en marcha este ano un programa que aposta por transformar o coñecemento xerado polo seu persoal investigador en produtos e servizos con valor no mercado. A súa primeira acción foi unha convocatoria de axudas a iniciativas con este obxectivo que acaba de ser resolta. Seis son os proxectos que acadaron financiamento ao seu abeiro e que se desenvolverán nos vindeiros meses. As temáticas que abordan van desde a loita contra os nematodo da pataca ata novas fontes de proteína a partir de insectos.

Segundo explican desde a súa organización, este Programa de pulo á valorización e transferencia do coñecemento do Campus Auga quere contribuír ao desenvolvemento económico da contorna e ao fomento da cultura emprendedora. Para acadalo, aposta por, con iniciativas coma estas axudas, identificar, valorizar e madurar resultados de investigación, nas súas diferentes fases de desenvolvemento, con potencial de explotación e impacto no mercado. Está financiado polo convenio de colaboración asinado entre a Consellería de Educación, Ciencia, Universidades e Formación Profesional e a Universidade de Vigo para executar accións estratéxicas no Campus Auga (2024-2027).

Másnoticias

El fotógrafo de Vigo que conquista a España con la imagen de un fotomatón

03/06/2026

Ni soja ni avena, la UVigo avanza para crear bebidas vegetales 100% gallegas con castaña o fabas

28/05/2026

Do científico-tecnolóxico ao empresarial

As iniciativas financiadas nesta primeira convocatoria do programa pertencen maioritariamente ao eido científico e tecnolóxico e están lideradas por persoal investigador de grupos de investigación do Campus Auga e procedentes da Escola de Enxeñaría Aeronáutica e do Espazo e das facultades de Ciencias e de Ciencias Empresariais e Turismo. Un dos proxectos beneficiarios céntrase na demostración da eficacia en campo da planta Solanum sisymbriifolium para a eliminación de quistes do nematodo da pataca. Liderado por Antía Gómez, o seu obxectivo é evitar un uso excesivo de nematicidas químicos nos terreos ofrecendo unha alternativa sostible e empregando unha estratexia biolóxica para a redución dos quistes presentes no solo. “A nivel económico, a estratexia proposta constitúe unha práctica agrícola altamente prometedora, tanto polo seu baixo custe de implantación como polo aforro significativo grazas á redución de nematicidas de síntese química”, sinala a investigadora.

Helena Raquel dos Santos é a investigadora que lidera outro dos proxectos elixidos e que se centra neste caso en novas fontes de proteína a partir de insectos mediante tecnoloxías de baixo impacto ambiental. Esta proposta procura estudar o potencial de transferencia dunha tecnoloxía desenvolvida no proxecto Inprosect-Incremento do valor das fariñas de insectos nun contexto de bioeconomía circular. “Os resultados non só impulsan o uso de insectos en alimentación, senón que tamén abren novas oportunidades para a bioeconomía e a economía circular”, apunta a súa responsable. No proxecto avaliarase a posibilidade de crear unha spin off a partir das tecnoloxías desenvolvidas para o procesado de insectos. Outro dos traballos financiados, a cargo da investigadora Ana María Torrado, é de validación do proceso a escala piloto de obtención enzimática de xilooligosacáridos prebióticos (XOS) a partir de palla de trigo e avaliación nun alimento real. O seu obxectivo é o deseño dun proceso novo e alternativo aos habitualmente empregados para a produción de oligosacáridos a partir do xilano insoluble de materiais lignocelulósicos.

Ferramentas de utilidade

Pola súa banda, Gonzalo Astray desenvolverá a iniciativa Intelixencia solar en Galicia: modelos de aprendizaxe automática para a irradiación solar global mensual. Inicio do camiño cara unha transferencia tecnolóxica. “Este proxecto baséase no desenvolvemento dunha ferramenta de aprendizaxe automática capaz de xerar predicións máis ou menos precisas da irradiación solar global mensual na comunidade autónoma de Galicia”, sinala o investigador. Esta ferramenta permitiría, engade, “empoderar aos usuarios ao ter acceso a información preditiva útil que os axudará á hora de tomar decisións como a localización máis axeitada das instalacións solares (de índole fotovoltaica ou térmica), planificar as actividades agrícolas ou xestionar o consumo de enerxía con vistas o futuro”.

Tamén se financiará un traballo sobre o desenvolvemento e promoción de Fortran Analyser, a cargo de Laura de la Torre. FortranAnalyser é un software libre que leva a cabo análise estática de código Fortran, axudando a mellorar a calidade e mantemento dos proxectos deste software. “A proposta presentada para o desenvolvemento de FortranAnalyser permitirá mellorar a súa implantación nas contornas empresariais e académica para posteriormente ofrecela e comercializala como un servizo de software como servizo”, apunta a súa responsable.

Xa fóra do eido científico-tecnolóxico completa a listaxe un traballo de análise da viabilidade operativa e comercial da ferramenta Renturs, de Diego Rodríguez Toubes. “Renturs presenta unha innovación metodolóxica singular no eido da avaliación de proxectos turísticos, ao ser a primeira ferramenta baseada en análise custo-beneficio adaptada especificamente para cuantificar o impacto social en contextos turísticos. A súa novidade radica na integración de variables socioambientais tradicionalmente excluídas dos modelos de decisión pública, como a calidade do emprego xerado, a preservación de ecosistemas sensibles e a inclusión de colectivos desfavorecidos”, explica o responsable da iniciativa.