O equipo de aeromodelismo UVigo Aerotech compite en Valencia co seu dron Peregrinus

O equipo de aeromodelismo UVigo Aerotech compite esta semana na XtraChallenge de Valencia. Faino co seu dron Peregrinus, froito dun proxecto multidisciplinar no que participaron ao longo deste curso académico 46 estudantes do campus de Ourense, fundamentalmente da Escola de Enxeñaría Aeronáutica e do Espazo e da Escola Superior de Enxeñaría Informática pero tamén da Facultade de Relacións Internacionais.

A XtraChallenge, que se celebra do 8 ao 11 de xullo, é unha competición española universitaria de aeromodelismo, concretamente de transporte de carga con drons de á fixa, creada en 2022 por estudantes da Universitat Politècnica de València, do equipo Xtra2 UPV. A cita xurdiu co propósito de animar ao alumnado estatal a deseñar, construír e pilotar aeronaves radiocontrol desde unha perspectiva de enxeñaría. O certame está baseado na Air Cargo Challenge e nesta edición conta coa participación de 20 equipos, sendo o da UVigo o único representante galego. “Para nós é un orgullo representar tanto a nosa cidade, Ourense, como a nosa universidade, a Universidade de Vigo, nesta competición”, indican desde UVigo Aerotech.

Másnoticias

Comeza a construción do edificio da Escola de Enxeñaría Aeronáutica e do Espazo

11/07/2025

El Cinbio de la UVigo identifica una vulnerabilidad en la resistencia de algunos cánceres a los fármacos

09/07/2025

Deseñado, fabricado e voado polos seus membros

O obxectivo da cita é que os equipos participantes deseñen e constrúan unha aeronave non tripulada capaz de transportar carga a máxima velocidade, cumprindo con estritas normas técnicas e de deseño. Na competición, os equipos van superando diferentes probas nas que se avalía a aeronave, desde as súas características técnicas e planos ata o seu modelo de negocio, e se fan diferentes probas de voo con ela. “O noso equipo participou nas tres últimas edicións XtraChallenge apostando por distintos conceptos e, nesta ocasión optamos por un deseño algo máis conservador”, sinalan desde o equipo.

UVigo Aerotech marcouse como obxectivo este curso que o seu modelo, deseñado, fabricado e voado integramente polos seus membros, puidese cargar a máxima cantidade de auga posible. O avión resultante, Peregrinus, ten unha envergadura (ancho) de 2,61 m, unha lonxitude (largo) de 1,56 m e unha payload (carga útil) de 1,2 Kg. Conta tamén cunha configuración de á baixa, cola en forma de V e tanques de auga integrados na zona superior da fuselaxe. Para prepararse para a competición, o equipo realizou ademais múltiples voos no campo de voo correspondente ao CAO, en Ourense.

Culminación dun curso de traballo

Peregrinus é a culminación do traballo realizado ao longo do curso académico polo estudantado dos graos de Enxeñaría Aeroespacial, Enxeñaría Informática, Intelixencia Artificial e Relacións Internacionais implicados. Elas e eles foron os encargados de levar a cabo todo o proceso, desde o deseño e fabricación da nave ata a busca de patrocinadores e de viabilidade económica do proxecto. Moi satisfeitos de ter conseguido chegar a competir nesta XtraChallenge 2025, o equipo da UVigo sinala que, seguindo a filosofía desta competición, a participación nesta cita é un premio a ese esforzo realizado ao longo de todo o curso e a culminación do proceso de aprendizaxe seguido. É ademais unha oportunidade de compartir coñecementos, experiencias e convivencia con equipos similares doutras universidades españolas.

Para poder chegar a presentar e competir en Valencia co seu vehículo propio, desde UVigo Aerotech destacan e agradecen o apoio dos seus patrocinadores, que son Nort3D, Axencia Galega de Innovación (Xunta de Galicia), Altair, Uarx Space, Coasa, Marine Instruments, Catec, Ansys, Centum, 3DExperience, Orensanex, CITI, Gurit, a Escola de Enxeñaría Aeronáutica e do Espazo, RDCWorks, Europrecis, Industrias Trimar e Utingal.