O proxecto SOSFood liderado pola UVigo leva o debate sobre transformar o sistema alimentario a Bruxelas

O 4 marzo conmemórase o Día Mundial da Obesidade e, coincidindo con esta efeméride, o proxecto SOSFood levará a Bruxelas o debate sobre a transformación do sistema alimentario. O catedrático Jesús Simal Gándara, membro do grupo de Investigacións Agrarias e Alimentarias (AA1) será o encargado de impartir un relatorio organizado por EuroCoop, a Cooperativa Europea de Asociacións de Consumidores, que terá lugar no Comité Económico e Social Europeo.

O proxecto SOSFood está formado por un consorcio de 17 entidades de toda Europa lideradas pola UVigo que traballan no uso da intelixencia artificial para deseñar un sistema alimentario seguro en resposa á crise ambiental. O obxectivo dos socios é aproveitar a explotación de datos e as tecnoloxías de IA para permitir unha toma de decisións informada entre todas as partes interesadas no sistema alimentario europeo, coa vista posta en acadar unha maior produtividade, inclusión, sostibilidade e resiliencia.

Másnoticias

La UVigo pone en marcha el horario especial de apertura de sus bibliotecas

09/05/2025

Inventos de Vigo que cambian la vida, de detectar baches a una app para buscar objetos perdidos

08/05/2025

Loita contra as enfermidades non transmisibles

O obxectivo deste evento na capital europea, explican dende o proxecto, é “explorar posíbeis accións para mellorar a sustentabilidade dos sistemas alimentarios co apoio da IA”. Destacan que “aínda que garantir a sustentabilidade ao longo da cadea alimentaria require accións estruturadas (lexislativas e non lexislativas), no xeral recoñécese que algunhas mudanzas nos hábitos de alimentación humana poderían axudar a reducir algunhas cargas”. Por exemplo, a redución da inxestión de carne, carne procesada e produtos lácteos, que “ten un efecto positivo sobre a saúde humana, con especial referencia ás enfermidades non transmisibles, como cancros ou diabetes. Na súa intervención, Simal centrarase en “como e ata que punto a promoción dunha dieta saudábel pode ofrecer unha solución para facer fronte á saúde humana e ambiental”.

Agárdase a asistencia a esta cita de asociacións e organizacións implicadas na sustentabilidade alimentaria e na loita contra as enfermidades non transmisibles (ENT). Entre outros, participarán o ILVO (Instituto de investigación de Flandes para a investigación en Agricultura, Pesca e Comida), o Pacto de política alimentaria urbana de Milán, HispaCoop (Confederación española de Cooperativas de consumidores e Usuarios), o think-thank FoodDrink Europe, a asociación de minoristas independentes no sector alimentario Independent Retail Europe, SAFE Europe (o estudo europeo para o intercambio de profesionais de radioterapia entre os distintos sistemas sanitarios, avanzando na investigación sobre o cancro) e o Grupo Permanente do Comité Social Económico e Europeo para os a Sostibilidade dos Sistemas Alimentarios.

O deseño dun sistema alimentario seguro

Cun financiamento de 4 millóns de euros a través do programa Horizonte Europa, o proxecto SOSFood botou a andar hai preto dun ano, en marzo de 2024, e ten unha duración total de 48 meses. Nel conflúen tanto organismos de investigación como empresas de España, Grecia, Lituania, Países Baixos, Portugal, Francia, Bélxica e Italia. A representación española, ademais da UVigo, inclúe á Universidade de Santiago de Compostela, á Axencia Galega de Desenvolvemento Rural (Agader), o Hub de Innovación Dixital DATALife e compañías agroalimentarias como Grupo Cuevas.

O proxecto conta con todos os actores responsables do sistema alimentario, e ten coma obxectivo o uso da analítica de datos e a Intelixencia Artificial para a mellora dos procesos de toma de decisión tanto a nivel de políticas como de xestión empresarial/industrial, produción de alimentos e compra/consumo. Para acadar os obxectivos, dous dos principais resultados do proxecto serán un "dashboard" de decisión que permitirá monitorizar e mellorar o proceso de produción, distribución e aproveitamento/xestión de residuos e unha app para consumidores con información sobre a trazabilidade dos produtos, a sostibilidade de cada un deles e as diferentes posibilidades que cada produto pode ofrecer desde un punto de vista nutricional e/gastronómico. Este último aspecto alíñase coa compoñente social do proxecto, que aborda o problema que supón o incremento constante da poboación tanto dende o punto de vista da sostibilidade dos recursos como dende a xustiza social e a garantía de alimentación de calidade para todos.