O PSOE de Vigo rexeita no pleno a moción para opoñerse aos novos recheos do Porto

A moción do BNG vigués para que o Concello de Vigo amose a súa oposición frontal a máis recheos na ría de Vigo proxectados pola Autoridade Portuaria non saíu adiante ao votar en contra o PSOE. O grupo municipal socialista quixo modificar o texto da moción presentado pola fronte nacionalista. Non quería falar de proxectos concretos, senón de recheos en xeral. O concelleiro Xabier Pérez Igrexas negouse ao considerar que se incumpría o regulamento do pleno.

A negativa a tocar ese texto da moción levou ao PSOE de Vigo a votar en contra. A proposta da fronte nacionalista si contou co apoio dos dous concelleiros de Marea de Vigo. O BNG levou esta oposición a novos recheos na ría de Vigo ao pleno celebrado este mércores. Pérez Igrexas destacou que esta proposta foi realizada pola Plataforma de Defensa da Ría de Vigo “Cíes”.

Másnoticias

Vigo estrena nueva heladería en Samil con la marca artesana que se expande por toda Galicia

16/06/2025

A la venta los billetes del histórico tren Expreso Rías Baixas que llega a Vigo en un viaje de ensueño

16/06/2025

A iniciativa pretendía que as forzas políticos que conforman o Concello se posicionasen de maneira “clara e rotunda” en contra de que se practiquen novos aterramentos. No concreto, demandaban que a Corporación viguesa instase ao Porto de Vigo que preside Enrique López Veiga a anular os recheos anunciados publicamente como son a ampliación da terminal de Bouzas, o recheo no Areal, o de Rande, o proxectado a carón da lonxa do Berbés “é calquera outro no ámbito litoral da ría de Vigo”.

O portavoz de Marea de Vigo, Rubén Pérez, destacou que “a Autoridade Portuaria pretende levar adiante recheos sen ter en conta cuestións ambientais” e apuntou que os proxectos da institución que preside López Veiga “poñen en risco a ría de Vigo e o sector produtivo e industrial na nosa cidade”. Pola súa banda, o PP evitou ofrecer a súa posición cos plans do Porto de Vigo e abstívose na votación.

O BNG de Vigo considera chave apostar polo desenvolvemento “racional e sustentábel” do Porto, para o que esixen que toda a superficie portuaria estea ocupada só por instalacións ligadas a actividade portuaria e tamén a que se impulse o porto seco na PLISAN e se conecte con ferrocarril a terminal de Bouzas. “O porto de Vigo é un importante motor económico e produtivo para a cidade, pero queremos que se desenvolva desde o máximo respecto ambiental e con racionalidade na planificación”, explicou Igrexas lembrando que, na actualidade, a Autoridade Portuaria carece de Delimitación de Espazos e Usos Portuarios e de Plan Especial.

Igrexas cuestionou no anuncio da moción estes proxectos de recheo que carecen de toda xustificación e que constitúen “unha clara agresión ambiental contra un ecosistema de enorme valor”, en alusión á ría, “Vigo xa lle gañamos ao mar con cemento máis de 3 millóns de metros cadrados. O tempo dos recheos rematou”, expresaba o portavoz nacionalista.