Os voluntarios retiran máis de 1.000 quilos de lixo na limpeza masiva de praias

A pasada fin de semana decenas de voluntarios “tomaron” 14 areais de Galicia para levar a cabo unha actividade de concienciación medioambiental a través da limpeza das mesmas. En total, 150 persoas participaron nesta acción que na área de Vigo tivo lugar en Baiona, Moaña e Nigrán.

No conxunto de areais recolléronse máis de 1.000 quilos de lixo, a meirande parte deles de plásticos, ademais de cordas, aparellos de pesca, caixas ou incluso un sofá.

Como apunta Adega, promotores desta actividade, o lixo mariño é unha das maiores problemáticas ambientais do planeta, provocando graves consecuencias sobre os ecosistemas acuáticos, e numerosas mortes de aves mariñas, mamíferos e tartarugas. Por iso, dende a asociación ecoloxista denuncian “os modelos de consumo da nosa sociedade, que produce millóns de toneladas de lixo ao ano”, refugallos que rematan nos océanos procedentes tanto das industrias como da poboación en xeral, por unha mala xestión dos residuos que xeramos.