Unha proposta para que os eucaliptos desaparezan de Vigo

O BNG de Vigo celebra o Día Mundial do Medio Ambiente cunha demanda. Propón ao Concello que declare Vigo “cidade libre de eucalipto”. “Trátase dunha especie forestal pirófita, que representa un claro risco ambiental e especialmente en materia incendiaria, tal e como se ten recollido mesmo en sentenzas xudiciais”, comentou este mércores 5 de xuño o concelleiro electo do BNG na cidade olívica, Xabier Pérez Igrexas.

“Esa declaración de cidade libre de eucalipto ten que ir parella dun maior esforzo por parte de todas as administracións, en colaboración coas comunidades de montes en man común da nosa cidade, para substituír a presenza de eucaliptos dos montes de Vigo por outras especies”, reclamou Pérez Igrexas.

Másnoticias

Detenido en Vigo por amenazar a otro hombre en Vigo con un cuchillo

27/08/2025

Una fiesta de Vigo anuncia un festival de música gratuito con hasta seis artistas

27/08/2025

A fronte nacionalista demanda expresamente a posta en marcha dun programa de colaboración coas comunidades de montes, dotado como mínimo cun millón de euros por parte do Concello, pero que ten que recibir tamén achegas por parte da Xunta de Galicia como administración responsable para axudar no proceso de substitución do eucalipto e para colaborar na reforestación da superficie afectada pola brutal vaga de lumes de outubro de 2017.

“A mellor maneira de celebrarmos o Día Mundial de Medio Ambiente é apostarmos en reconciliar a cidade co seu medio natural. No BNG entendemos que unha das tarefas máis importantes é a posta en valor e a recuperación dos nosos montes, dese verdadeiro pulmón verde que representan os montes periurbanos da cidade”, sostén o edil electo.

Pérez Igrexas urxe tamén a atender o reclamo das propias Comunidades de Montes dun maior apoio público. “Non se trata só de reivindicar a nivel discursivo a defensa do noso medio ambiente, senón que é necesario tomar decisións e despregar esforzos concretos e destinar recursos para facelo unha realidade”, afirmou o que será novo edil da Corporación viguesa.