Cinco libros para desfrutar da literatura galega este verán

Dende crimes por resolver ata unha visita ao pasado da nosa cidade. Nesta selección de libros en galego atópanse historias de todas as tipoloxías, para eses días de verán nos que apetece mergullar entre páxinas. Coñece estas novelas que non poderás deixar de ler ata ter rematado!

Os 5 mellores libros en galego

• Marxes. Guía ilustrada do Vigo rebelde, de Xurxo Martínez

Másnoticias

O moañés Juan Parcero presenta a súa última novela este venres

04/04/2018

Os cativos con diversidade funcional tamén cociñan, en verso e en galego

15/12/2017

"Marxes" traza un mapa afectivo con itinerarios por Vigo no que que se rememoran, con textos, fotografías e ilustracións, as batallas do Vigo rebelde e solidario. Son 40 historias reais que retratan con emoción episodios relevantes para as clases populares viguesas.

• O que a marea esconde, de María Oruña

Todo está pronto para a festa de homenaxe ao ex tenista Basil Rallis a bordo da goleta La Giralda, nas fermosas augas da baía de Santander cando a organizadora, a arrebatadora Judith Pombo, aparece morta encerrada no seu camarote. Todos os invitados pasan a ser sospeitosos nun caso de asasinato aparentemente imposible.

• Flores de ferro, de María Rei Vilas

Camila viviu durante décadas unha mentira sostida coa complicidade dos que a rodean. No seu regreso á vila de Briana, no verán de 1987, deberá reunir o valor para enfrontarse á verdade. Alí, Antón, o ferreiro artista, pechouse no seu mundo, a arrastrar a dor e a culpa dos que non souberon ver como o mal se estendía ata que foi demasiado tarde. A visita da súa neta, Helia, vivo retrato da avoa, daralle azos para contar o que durante tantos anos calou.

• Todo canto fomos, de Xose Monteagudo

Unha mestra que loita contra a desigualdade e os prexuízos sociais nunhas circunstancias difíciles.
Un escritor de novelas policiais, residentes en Londres, que descobre unha verdade sorprendente entre os papeis do legado da súa nai. Unha moza que persiste nun noivado secreto e prohibido. Un emigrante galego na Arxentina que non esquece a súa orixe mentres anda en procura do éxito económico. Un historiador que, arrastrado pola violencia dos acontecementos, lembra os momentos cruciais da súa vida. Estes son algúns dos personaxes que compoñen unha trama na que a normalidade é só a aparencia baixo a que se ocultan misterios inquietantes. Todo canto fomos é unha novela que percorre máis de un século de historia galega para devolvernos o relato dun pasado que segue alentando no presente.

• Despois da erosión, de Laura de Cáceres

Tras a erosión, a ferida campa con felicidade, nunha sorte de benvida que abre as fendas do glaciar. Entramos por esas portas de luz a piques de esvaecerse, fíos para funámbulas e outros seres dispostos á tenrura e ao risco de confiar nun horizonte. Viaxe que atravesa as primeiras capas do rochedo e atopa unha pel, que narcoticamente rodea as feridas con palabras ata esquecelas. Como di Anne Carson unha ferida despide a súa propia luz e non sabemos ata onde pode chegar o resplandor, mais confiamos na voz firme de Laura de Cáceres que nos advirte da entrega feroz: confianza era achegar a man aberta a un ferro ardendo
sabendo que non ías relaxar nin un só músculo.

Para os máis cativos:

• Gazafellos, de Fon Barreiro

Quen che contou que os Gazafellos non existen? Abofé que existen. E son ben graciosos e extravagantes. Descubre que aventuras lles pasaron a Mauro e Tiago cando coñeceron a Fede e o seu mundo se revolucionou.

• Axente X.99, de Gianni Rodari

As fantásticas aventuras de quen fora gardián do radiofaro do asteroide X.99 é outro dos inesquecibles clásicos de Gianni Rodari. Historias para deleitarse coa palabra e cos xogos lingüísticos, co humor e co enxeño. Mundos e encontros fascinantes movidos pola curiosidade o desexo de amizade, coa excusa de exercitar a imaxinación.

• A qué sabe a lúa?, de Michael Grejniec

Había moito tempo que os animais andaban a matinar a que sabía a lúa. Era doce ou salgada? Só querían probar un anaco pequeno. Polas noites, miraban ansiosos para o ceo. Estarricábanse e estiraban o pescozo, as pernas e os brazos, tentando collela... Quen non soñou algunha vez con darlle unha dentada á lúa? Este foi precisamente o desexo dos animais deste conto. Tan só querían probar un anaquiño pero, por máis que se estiraban, non eran quen de tocala. Daquela, a tartaruga tivo unha idea xenial: Se sobes ao meu lombo, poida que cheguemos onda ela?, díxolle ao elefante.

Todos estes títulos e moitas máis apostas en galego poderedes atopalos estes días na Feira do Libro de Vigo que acolle a Rúa do Príncipe ata a próxima semana.