Grupos musicais de Vigo únense para esixir salas de ensaio e cargan contra o peche de Vigosónico

Diferentes grupos musicais de Vigo veñen de crear unha nova plataforma, “Grupos de Vigo en loita” para denunciar a ausencia de salas públicas e gratuitas de ensaio na cidade. Nun comunicado, lamentan que mentres que noutros concellos reabriron progresivamente as súas salas despois da desescalada do confinamento de 2020, o Goberno local de Vigo mantivo pechado Vigosónico, o espazo para a creación musical municipal situado en Valadares, despois de que o Concello tamén clausurara a Casa da Xuventude e as salas do Castro.

“Despois de meses sen información ao respecto, as usuarias e usuarios de Vigosónico recibiron a mensaxe de que podían por fin ir buscar o seu material, tras meses en condicións de humidade descontroladas, xa que o peche que no seu momento foi temporal sería indefinido”, explican dende a agrupación.

Másnoticias

Liquidación total de una de las tiendas vintage de Vigo con ropa a 3€ y descuentos hasta el 80%

08/07/2025

Aterriza en el centro de Vigo una marca internacional para eliminar el "tatuaje erróneo"

08/07/2025

Estes feitos suscitaron unha serie de protestas que continúan a día de hoxe, máis dun ano despois deste peche indefinido. Por iso, integrantes de bandas de Vigo e da zona uníronse agora en torno á plataforma “Grupos de Vigo en Loita”, para demandar "unhas salas de ensaio públicas, gratuítas e accesibles a disposición de todas as músicas e músicos vigueses", coa reapertura de Vigosónico “como mínimo”, sendo “ideal” tamén a reapertura do resto de espazos pechados nos últimos anos. A plataforma ten xa presencia nas diferentes redes sociais.

Dende Grupos de Vigo en Loita denuncian "a perda de espazos de ocio e culturais para a mocidade e para a poboación xeral", nas que se encadraría o peche de Vigosónico e das súas predecesoras, que eran máis accesibles pola súa situación máis céntrica na cidade. Un peche que dende o colectivo consideran "totalmente inxustificado por criterios sanitarios, como amosa a actividade das salas de ensaio privadas e as públicas de moitos outros Concellos". Hai uns meses, as bandas de Ferrol seguiran un camiño similar coa creación da plataforma Reapertura Xa Locais de Ensaio Ferrol, que segue a desenvolver a súa actividade para esixir a reapertura dos locais do mercado da Magdalena.