Tanxugueiras lanza o seu novo disco un día antes de actuar en Vigo no auditorio de Castrelos

Tanxugueiras xa ten data de lanzamento do seu terceiro disco: o venres 29 de xullo. Un día máis tarde, o 1 de xullo, actuarán no auditorio de Castrelos en Vigo nun concerto gratuíto e, previsiblemente, masivo. As pandeireteiras revelan así unha das preguntas máis recurrentes pola súa comunidade de fans, que nos últimos meses tiveron ocasión de escoitar, paseniño, algúns dos sinxelos que formarán parte do mesmo, como ‘Desidia’, ‘Pano Corado’, Averno’, ‘Figa’, ‘Midas’ou ‘Terra’. O novo álbum, que as cantareiras están a avanzar nos directos da súa espectacular Xira Midas, terá a súa presentación oficial no festival SonRías Baixas de Bueu.

No marco deste anuncio, o grupo presenta a Plataforma de Afectadxs polo Novo Álbum de Tanxugueiras, a campaña de prevenda deste terceiro disco e no que Olaia Maneiro, Aida Tarrío e Sabela Maneiro animan ao público a reservar e apoiar o seu novo traballo discográfico. “Non temos a portada, non temos o nome do disco e, como sigamos así, non imos ter vergoña. Pero se cres que somos un investimento máis seguro que as criptomoedas, xa podes apoiarnos coa prevenda do disco”, sinalan as músicas.

Másnoticias

Tres candidaturas diferentes concurrirán a la Asamblea del BNG

21/11/2024

La provincia de Pontevedra, la única de Galicia sin alertas por la borrasca Caetano

20/11/2024

A plataforma é, ademais, unha chiscadela do trío de cantareiras á súa comunidade de fans para “combatir o tanxumono” mentres que o álbum non chega. “Entre os síntomas máis comúns do tanxumono”, segundo sinalan Olaia, Aida e Sabela, inclúese “o tembleque pandeireteiro nunha das mans ou aturuxar máis de tres veces ao día sen motivo aparente”.

A Plataforma de Afectadxs polo Novo Álbum de Tanxugueiras inclúe vídeos con declaracións de afectadas que están a experimentar no seu día a día esta sintomatoloxía. É o caso dunha avoa, dun DJ e xornalista (Carlos Crespo), das ocas de Olaia ou mesmo de Laura, responsable de merchandising de Tanxugueiras. O acceso á prevenda do disco está dispoñible desde a propia páxina web da plataforma.

https://www.youtube.com/watch?v=_M9eQKcwigo

Novo sinxelo na noite de San Xoán

A noite meiga é unha data moi sinalada en Galicia. Tanxugueiras quere celebrar este San Xoán presentando un novo tema para “dar a benvida ao novo, ao lume purificador e deixar atrás malos recordos e cargas innecesarias”. Así, o vindeiro venres 24, a partir das 00.00 horas, Tanxugueiras publicará en todas as plataformas dixitais o sinxelo ‘Seghadoras’, tema que se acompañará dun videoclip que terá, de novo, a Sabela Maneiro, Aida Tarrío e Olaia Maneiro como protagonistas.

Ao longo deste 2022, o grupo deu a coñecer algunhas das súas creacións que estarán presentes neste terceiro álbum. É o caso das recentemente lanzadas ‘Desidia’ ou ‘Pano Corado’, ademais das xa coñecidas ‘Averno’ (que conta coa colaboración de Rayden), ‘Midas’, ‘Figa’ ou ‘Terra’, temas que suman millóns de reproducións e visualizacións nas plataformas.